JEBRR pahoršyŭ svoj prahnoz padzieńnia ekanomiki Biełarusi

Jeŭrapiejski bank rekanstrukcyi i raźvićcia źniziŭ prahnozy ekanamičnaha rostu dla Ukrainy, Biełarusi i Małdovy, paviedamiła pres-słužba JEBRR. 

Va ŭsich troch krainach prahnazujecca padzieńnie VUP u 2015 hodzie, pryčym, jak padkreślivaje JEBRR, u Biełarusi ŭ 2015 hodzie ŭpieršyniu zafiksavana padzieńnie VUP amal za 20 hadoŭ bieśpierapynnaha rostu. 

Zhodna z acenkami, za pieršyja dzieviać miesiacaŭ 2015 hoda ekanomika Biełarusi ścisnułasia na 3,7% pad značnym upłyvam recesii ŭ Rasii. 

Ciapier JEBRR prahnazuje padzieńnie VUP Biełarusi da 3,5% u 2015 hodzie i 1% u 2016-m.

U mai hetaha hoda Jeŭrapiejski bank rekanstrukcyi i raźvićcia čakaŭ źnižeńnia VUP Biełarusi ŭ 2015 hodzie na 2,5%. 

«Ekanamičny prahnoz na 2015 hod dla krain Uschodniaj Jeŭropy i Kaŭkaza pahoršany z ulikam upłyvu recesii ŭ Rasii, a taksama bolš hłybokaj recesii va Ukrainie i Biełarusi», — havorycca ŭ apošnim ahladzie JEBRR ekanamičnaj situacyi ŭ rehijonie.

Pavodle acenak ekśpiertaŭ banka, u cełym pierśpiektyvy ekanamičnaha rostu ŭ rehijonie apieracyj JEBRR zastajucca nieadnarodnymi. Na krainy va ŭschodniaj častcy hetaha rehijonu niehatyŭna ŭpłyvaje recesija ŭ Rasii, a taksama nizkija ceny na naftu i inšuju tavarna-syravinnuju pradukcyju.

JEBRR čakaje, što VUP Rasii pamienšycca na 4,2% u 2015 hodzie i na 1,2% u 2016-m. Heta tłumačycca źnižeńniem ab`iomaŭ spažyvańnia i inviestycyj z-za značnaha padzieńnia cen na naftu, strukturnych prablem i ŭpłyvu ekanamičnych sankcyj.

Recesija pavinna źmiakčycca ŭ 2016 hodzie, kali ekanomika prystasujecca da nizkich cen na naftu, ličać u Jeŭrapiejskim banku rekanstrukcyi i raźvićcia. Treba adznačyć, što novy prahnoz JEBRR praktyčna supadaje z novym prahnozam Suśvietnaha banka, jaki byŭ abnarodavany 2 listapada. Ekanamisty Suśvietnaha banka čakajuć, što ŭ 2015 hodzie VUP Biełarusi źnizicca na 3,5%, u nastupnym hodzie — na 0,5%.

«Strukturnyja dysbałansy, jakija nazirajucca z 2008 hoda, uzmacniajucca źnižeńniem popytu na rynkach Rasii i Ukrainy, a taksama padzieńniem cen na syravinu, što abumoŭlivaje hłybiniu čakanaha spadu. Adnaŭleńnie ŭnutranaha popytu vyhladaje małavierahodnym», — tłumačać ekanamisty Suśvietnaha banka admoŭnuju dynamiku VUP Biełarusi.

Na ich dumku, karotkaterminovaje stymulavańnie ŭnutranaha popytu za košt kvazifiskalnych mier i pavyšeńnia zarpłat amal niemahčymaje va ŭmovach značnych vypłat dziaržavy pa źniešnich abaviazacielstvach. 

«U nazvanych abstavinach stahnacyja ekanomiki ŭjaŭlajecca najbolš vierahodnym scenaryjem. Z pryčyny mahčymych vahańniaŭ abmiennaha kursu i zapłanavanaha rostu taryfaŭ na žyllova-kamunalnyja pasłuhi ŭzrovień inflacyi pa-raniejšamu budzie vymiaracca dvuchznačnymi ličbami», — prahnazujuć ekanamisty Suśvietnaha banka.

• 0
• 0
• 0
• 0
• 0
• 0
• 0
• 0