Najbolšyja dachody siarod kandydataŭ u prezidenty ŭ 2014 hodzie mieŭ Alaksandr Łukašenka, najmienšyja — Taćciana Karatkievič. Adpaviednaja infarmacyja raźmieščana na sajcie Cientrvybarkama. Aficyjny zarobak Alaksandra Łukašenki vyras da prykładna 4500 dalaraŭ u 2014 hodzie. Źviartaje ŭvahu taksama, što i Hajdukievič, i Ułachovič, i žonki kožnaha ź ich mieli ŭ 2014-m prykładna adnolkavy dachod — kala 2000 dalaraŭ za miesiac.
Dachod staršyni Libieralna-demakratyčnaj partyi (ŁDP) Siarhieja Hajdukieviča skłaŭ 263 młn 158 tys. 324 rubli. Heta dachody ad zarabotnaj płaty, piensii, ad prodažu aŭtamabila, a taksama dachod, atrymany z-za miažy i štomiesiačnaje hrašovaje ŭtrymańnie. Va ŭłasnaści Hajdukieviča znachodziacca lehkavyja aŭtamabili: NISSAN X-TRAIL 2014 vypusku i BMW 730 1996 vypusku.
Dachody jaho žonki Ały Hajdukievič ad zarabotnaj płaty i ad zdačy ŭ arendu majomaści skłali 238 młn. 260 tys. 448 rubloŭ. U jaje ŭłasnaści znachodziacca: žyły dom u vioscy Siomkava Minskaha rajona ahulnaj płoščaj 155 kv.m.; ziamielny ŭčastak u vioscy Siomkava Minskaha rajona płoščaj 0,25 ha; adnapakajovaja kvatera ŭ Minsku ahulnaj płoščaj 30 kv.m; adnapakajovaja kvatera ŭ Minsku ahulnaj płoščaj 25 kv.m; dvuchpakajovaja kvatera ŭ Minsku ahulnaj płoščaj 35 kv.m. Taksama jana vałodaje lehkavym aŭtamabilem RENAULT-DUSTER 2013 vypusku.
Dachody aktyvistki kampanii «Havary praŭdu» Taćciany Karatkievič ŭ 2014 hodzie skłali 60 młn 86 tys. 98 rubloŭ. Heta dachody ad zarabotnaj płaty i dachody, atrymanyja pa dahavoru dareńnia. Nieruchomaj majomaści i transpartnych srodkaŭ u jaje va ŭłasnaści niama.
Dachody jaje muža Vitala Karatkieviča skłali 40 młn 47 tys. 237 rubloŭ. U jaho va ŭłasnaści znachodziacca lehkavyja aŭtamabili FORD SCORPIO 1988 vypusku i HONDA ACCORD 1998 hoda vypusku. Dachody maci Karatkievič Natalli Chaleckaj skłali 108 młn 536 tys. 6 rubloŭ, u jaje va ŭłasnaści znachodzicca kvatera ŭ Minsku ahulnaj płoščaj 62 kv.m.
Dachod dziejučaha prezidenta Alaksandra Łukašenki ŭ 2014 hodzie ad zarabotnaj płaty skłaŭ 551 młn 761 tys. 258 rubloŭ. Inšyja dachody i ŭłasnaść u jaho, zhodna z dekłaracyjaj, adsutničajuć.
Dachody žonki dziejučaha prezidenta Haliny Łukašenki ad zarabotnaj płaty, piensii i dyvidendaŭ skłali ŭ 2014 hodzie 98 młn 223 tys. 332 rubli. U jaje va ŭłasnaści znachodziacca: žyły dom u Škłovie Mahiloŭskaj vobłaści ahulnaj płoščaj 115 kv.m; 1/2 dola ŭ pravie ŭłasnaści na žyły dom u vioscy V.Miežnik Škłoŭskaha rajona Mahiloŭskaj vobłaści ahulnaj płoščaj 53 kv.m.; 56 akcyj AAT «Škłoŭski masłarobny zavod».
Dachody staršyni Biełaruskaj patryjatyčnaj partyi, viarchoŭnaha atamana RHA «Biełaruskaje kazactva» Mikałaja Ułachoviča ŭ 2014 hodzie ad zarabotnaj płaty i piensii skłali 243 młn 502 tys. 475 rubloŭ. U jaho va ŭłasnaści znachodziacca: žyły dom u vioscy Jackaŭščyna Lachavickaha rajona Bresckaj vobłaści ahulnaj płoščaj 82 kv.m; ziamielny ŭčastak u vioscy Jackaŭščyna Lachavickaha rajona Bresckaj vobłaści płoščaj 0,25 ha; žyły dom u vioscy Młyn Čašnickaha rajona Viciebskaj vobłaści ahulnaj płoščaj 45 kv.m.; 240 tysiač akcyj AAT «Parytet bank».
Dachody jaho žonki Raisy Ułachovič ad zarabotnaj płaty i piensii skłali 235 młn 323 tys. 678 rubloŭ. U jaje va ŭłasnaści znachodzicca: kvatera ŭ Minsku ahulnaj płoščaj 148 kv.m.; haraž-boks u Minsku płoščaj 24 kv.m; administracyjna-handlovaje pamiaškańnie ŭ Minsku płoščaj 64 kv.m (dola — 99/100); administracyjnaje pamiaškańnie ŭ Minsku płoščaj 34 kv.m. (dola — 99/100); handlovaje pamiaškańnie ŭ Minsku płoščaj 16 kv.m. (dola — 99/100); handlovaje pamiaškańnie ŭ rajonie vioski Aziarco Minskaha rajona płoščaj 10 kv.m.
Kamientary