Chłopiec patanuŭ u Drazdach, jon pamior z-za niasvoječasovaj dapamohi?
Na plažy musiŭ dziažuryć miedyk, a pobač znachodzicca «chutkaja». Ale vidavočca kaža, što padčas akazańnia pieršaj dapamohi zdaryłasia nieraźbiarycha.
Subotnim viečaram 8 žniŭnia na plažy vadaschovišča ŭ minskich Drazdach patanuŭ 26-hadovy chłopiec. Jaho vyciahnuli z vady i sprabavali ŭratavać. Toje, jak heta adbyvałasia, aburyła vidavočcaŭ trahiedyi.
«Ja heta ŭbačyła, kali la chłopca sabraŭsia ŭvieś plaž. Z momantu, jak jaho dastali, prajšło chvilin 10. U natoŭpie byli ludzi, jakija nazirali za ŭsim z samaha pačatku. Małady čałaviek, kurčavy, u formie Tavarystva vyratavańnia na vodach, nie rabiŭ niejkich aktyŭnych dziejańniaŭ nakont vyratavańnia. Supracoŭniki słužby tolki razhaniali natoŭp. Mieddapamohu na maich vačach akazvali tolki supracoŭnik AMAP i niejkija dźvie dziaŭčynki, jakija adpačyvali na plažy», — śćviardžaje Kaciaryna, vidavočca zdareńnia.
Padčas akazańnia dapamohi, jak zhadvaje Kaciaryna, utvaryłasia nieraźbiarycha.
Dziaŭčynie padałosia padazronym toje, što nohi tapielca znachodzilisia ŭ vadzie. Jak kazali inšyja ziavaki, nichto nie sprabavaŭ pieraviarnuć jaho na bok ci na žyvot, kab adkačać ź lohkich vadu. Vyratavalniki pacikavilisia navat tym, ci moža niechta z adpačyvajučych akazać pieršuju mieddapamohu, kaža vidavočca:
«Chutkaja» pryjechała prykładna praz 20-25 chvilin paśla taho, jak jaho dastali. Heta doŭha, ludzi aburalisia, što ŭ takim miescy nie było miedykaŭ. «Chutkaja» pryjechała. Chvilin praź siem ludzi zaapładziravali, niechta kryčaŭ: «Jon dychaje, jon dychaje». Ale paśla hetaha chłopiec vielmi chutka pačaŭ sinieć…»
Kaciaryna pryhadała i toje, što supracoŭniki Tavarystva vyratavańnia na vodach i AMAP spytalisia ŭ ludziej, chto dastaŭ tapielca z vady.
«Ale nichto nie pryznaŭsia. Chłopiec adpačyvaŭ z dvuma siabrami. Jany vyhladali vielmi niećviarozymi. AMAPaviec ci to vobrazna, ci to pa praŭdzie skazaŭ, što na traich vypili 100 litraŭ piva», — apaviadaje Kaciaryna.
Viadoma, što z 1 traŭnia pa 31 vieraśnia na papularnych plažach pavinny dziažuryć nie tolki supracoŭniki Tavarystva vyratavańnia na vodach, ale i miedrabotnik dy śpiecyjalizavanyja bryhady chutkaj mieddapamohi. Niaŭžo ŭ krytyčny momant tych, chto pavinien apieratyŭna i kvalifikavana vyratavać čałavieka, na miescy nie było?
Źviazvajemsia ź viadučym śpiecyjalistam Minskaj haradskoj arhanizacyi tavarystva vyratavańnia na vodach Aleham Pierasiatnikam.
Jon tolki-tolki viarnuŭsia z adpačynku i daje infarmacyju pavodle dakumientaŭ, jakija zapoŭnili jaho kalehi. Dyk voś, viersija vyratavalnikaŭ mocna adroźnivajecca ad taho, što raskazała vidavočca.
«Hramadzianin kupaŭsia ŭ stanie ałkaholnaha apjanieńnia. Jon patanuŭ. Jaho našy vyratavalniki vyciahnuli z vady. Praviali jamu niepramy masaž serca, štučnuju vientylacyju lohkich. Dla hetaha navat prymianiali adpaviedny aparat. Adnačasova była vyklikanaja bryhada «chutkaj». U nas navat numar jość hetaj bryhady. Jaho advieźli ŭ druhuju haradskuju kliničnuju balnicu, žyvoha. U vyratavańni brali ŭdzieł našy supracoŭniki ź vialikim stažam: Sałaŭjoŭ, Łukašyk, Łuščynski, Šykalan. Mužčyna žyvy źjechaŭ u balnicu. A dalej jon dźvie hadziny tam pabyŭ i pamior», — daje infarmacyju Aleh Pierasiatnik.
U svaju čarhu zusim procilehłaje paviedamlaje ahienctva «Minsk-naviny», jakoje časta na pryjarytetnaj asnovie infarmujuć staličnyja dziaržaŭnyja orhany. Pavodle viersii ahienctva, da supracoŭnikaŭ AMAP źviarnulisia padletki, jakija vyciahnuli tapielca z vady. A pieršasnyja reanimacyjnyja mierapryjemstvy pravodziŭ staršy lejtenant Viktar Mazaleŭski, jaki «zapuściŭ serca paciarpiełaha».
Ciapier čytajuć
Śpiecsłužby atrymali dostup da pierapiski ŭ Signal, choć sama prahrama ŭžo była vydalenaja. Toje samaje mahło być i z TH. Jak tak i jak zaścierahčysia?22
Kamientary