Kreml ułomlivaje biełarusaŭ na valutu ź dźviuchhałovym arłom
Da Łukašenki bumeranham viarnułasia jahonaja ž kolišniaja karonnaja fraza. Piša ŭ svaim błohu Alaksandar Kłaskoŭski.
Na svajoj umoŭna raźvitalnaj presavaj kanferencyi 14 lutaha Pucin reanimavaŭ zvonkuju intehracyjnuju rytoryku. Jen nazvaŭ budaŭnictva sajuznaje dziaržavy pryjarytetam zamiežnaj palityki Kramla.
U hetym pytańni "my hatovyja pajści tak daloka, jak hetaha chočuć našyja biełaruskija partnery", zajaviŭ kiraŭnik Rasiei. Takim čynam da Łukašenki bumeranham viartajecca jahonaja kolišniaja karonnaja fraza.
Ciapier užo ciažka ŭjavić, što niekali biełaruski prezydent rehularna klejmavaŭ maskoŭskich tavaryšaŭ za toje, što vałavodziacca z "bratnim jadnańniem". Ciapier my raz-poraz čujem zusim inšyja filipiki — datyčna nachabstva "tłustych katoŭ", što chacieli b "pryvatyzavać usiu Biełaruś". Vynik intehracyjnych hulniaŭ dla aficyjnaha Miensku najlepiej adlustroŭvaje vysłoŭje "Za što zmahalisia, na toje i narvalisia".
"I najpierš, na maju dumku, havorka pavinna iści pra intehracyju ŭ sfery ekanomiki", — padkreślivaje siońnia Pucin. Inačaj kažučy, paćviardžajecca teza analitykaŭ pra vybranuju zaraz Kramlom stratehiju paŭzučaj ekanamičnaj ekspansii. U pryvatnaści, jak užo zaznačaŭ aŭtar hetych radkoŭ, usio vyraźniej vymaloŭvajecca perspektyva finansavaj piatli.
Pakazalna, što pieršym numaram u tyradzie Pucina prachodzić pytańnie adzinaj valuty, ci, naŭprost kažučy, pierachodu na rasiejski rubiel. "Siońnia, kali rasiejskaja finansavaja systema stabilnaja jak nikoli, upeŭnieny, dla biełaruskaj ekanomiki, dla hramadzianaŭ Biełarusi ničoha, akramia plusaŭ, tut niama", — pierakonvaje kiraŭnik susiedniaj dziaržavy nierazumnych "małodšych bratoŭ". Tak daškolnikaŭ uhavorvajuć na pryviŭku. Maŭlaŭ, nia bojciesia, heta zusim nie baluča!
A jak ža, ad stabilnaj valuty ź dźviuchhałovym arłom — sucelnyja plusy! Kali nie ličyć adnaho "maleńkaha" minusu — perspektyvy stracić niezaležnaść.
Kamientary