Akupavać Biełaruś u bližejšyja hod-dva zaklikaje sajt rasiejskich šavinistaŭ
Rasija musić «viarnuć, jak minimum Ukrainu i Biełaruś» u bližejšy čas, bo mienavita zaraz skłalisia dla hetaha spryjalnyja ŭmovy, jakich chutka ŭžo nie budzie, piša hałoŭny redaktar samaha vialikaha i papularnaha sajta rasiejskich šavinistaŭ «Sputnik i Pohrom» Jahor Praśvirnin.
«Hod, maksimum dva — usio, što zastałosia dla kidka, dalej dziesiacihodździe ekanamičnaha chaosu, adčajnych reformaŭ, palityčnaj baraćby, moža być, navat hramadzianskaj vajny», — adznačaje Praśvirnin, čyj sajt drukuje rezka antybiełaruskija i antyŭkrainskija artykuły.
Pa jahonaj łohicy, u hetych abstavinach Rasija pavinna skarystacca hetym apošnim na bližejšy čas šancam, kab akupavać Ukrainu i Biełaruś.
«Vy nikoli nie dumali, što Rasija zaraz — adzinaja bujnaja kraina śvietu, jakoj vyhadnaja vajna?… Ciapier my — karali na hary, adzinaja bujnaja kraina, jakaja maje i mahčymaści, i pryčyny vajavać razam z razbałansavanaściu našych asnoŭnych praciŭnikaŭ, jakija zaniatyja inšymi spravami», — piša Praśvirnin, jaki taksama finansava padtrymlivaje rasijskich bajevikoŭ, što vajujuć suprać Ukrainy.
ZŠA, na jahony pohlad, skavanyja kanfliktami na Bližnim Uschodzie, a taksama vymušanyja rychtavać adkaz na padvyšeńnie siłaŭ Kitaju. Jeŭrasajuz uvohule nie maje bajazdolnych vojskaŭ i nie choča vajavać. Kitaju, Turcyi, Iranu — nie da Rasii.
A voś RF, jak ličyć Praśvirnin, maje i dośvied vajny, i sučasnyja ŭzbrajeńni — ale ich treba vykarystać užo zaraz, bo chutki ekanamičny kryzis moža chutka zvalić Maskvu ź pika vajennaj mocy. Ale treba dziejničać užo zaraz, zaklikaje jon.
«Raniej u nas nie było armii… Potym nie budzie ekanomiki… Nie treba zabyvacca i pra Ukrainu: jak vy možacie bačyć, tam zamiest čakanaha razvału praciahvajecca kansalidacyi ŭłady, iduć pastaŭki zbroi i chutkaje navučańnie ukrainskaj armii, i ŭ cełym ukrainskaja bajazdolnaść raście chutkimi tempami», — dadaje aŭtar.
Jon paraŭnoŭvaje situacyju 2015 hoda ź situacyjaj 1975, kali, na jahony pohlad, ZŠA tolki vyjšli ź ciažkaj vajny ŭ Vjetnamie, byli stomlenyja vajnoj, dziejničaŭ niepapularny prezident Džerald Ford.
«Padčas usioj Chałodnaj vajny heta byŭ adziny momant, kali savieckaja ataka mahła spracavać… Saviecki Sajuz hetaj mahčymaściu nie skarystaŭsia — i razvaliŭsia», — piša Praśvirnin.
Raniej sajt Praśvirnina pisaŭ pra «štučnaść» biełaruskaj movy, ździekavaŭsia ź biełaruskaha narodu, historyi i kultury, pahražaŭ Biełarusi i asabista Alaksandru Łukašenku «źjaŭleńniem narodnych respublik na ŭschodzie (a potym, mahčyma, i na zachadzie) siońniašniaj RB».
«Ja tolki prapanuju zrazumieć, što apošni raz takoje akno mahčymaściaŭ było ŭ 1975 hodzie. Sorak hod tamu. Nastupny raz surjozna my takija razmovy zmožam vieści ŭ 2055 hodzie, pryčym dziaržava budzie nazyvacca inakš», — zaklučaje jon.
Jakim čynam kanapny «hienierał» źbirajecca pravieści padobnuju apieracyju, kolki vojskaŭ spatrebicca, kab kantralavać vializnyja terytoryi Ukrainy i Biełarusi, jakim čynam takaja ahresija ŭratuje RF ad ekanamičnaha kryzisu — na hetyja pytańni adkazaŭ Praśvirnin nie daje.
Adnak na naš pohlad, artykuł jarka śviedčyć pra staŭleńnie da susiedziaŭ i militarysckuju isteryju jak minimum siarod zaŭvažnaj častki adeptaŭ «ruskaha śvietu».
Raniej pra toje, što Rasii treba rychtavacca da vialikaj vajny, i pra viartańnie ŭ miežy «jak minimum» 1939 hoda pisaŭ aficer FSB i były kamandujučy bajevikami «DNR» Ihar Hirkin-Strałkoŭ, kumir vialikaj častki rasiejskich šavinistaŭ.
«Treba rychtavacca da vialikaj vajny… A užo zaraz — treba całkam raźbić ukraŭ, pakul jany nie hatovyja da poŭnamaštabnaha ŭdaru. Viasnoj budzie pozna», — pisaŭ Hirkin u kancy 2014 hoda.
U Biełarusi peŭnyja prarasiejskija arhanizacyi, u tym liku «kazackija», pieradavali dapamohu «Ruchu Navarosija», jaki ŭznačalvaje Hirkin.
Kamientary