Kali Łukašenka adčynić akno

Pavažanaja redakcyja «Našaj Nivy», čytajučy apošnija numary, dzivu dajusia, jak hazieta imkniecca pieraplunuć «SB» u ačmureńni svaich čytačoŭ niejkaj «miakkaj biełarusizacyjaj».

To hazieta paviedamlaje dopisam Marcinoviča, što Biełaruś adbyłasia, to źmiaščaje artykuł Piatra Rudkoŭskaha «Hladzicie, kamu Łukašenka adčyniaje akno», to drukuje artykuł Kaciaryny Andrejevaj, u jakim jana paviedamlaje, što «adčuvaje nadychodziačuju łavinu biełarusizacyi».

Dy nikomu biełaruski Hierastrat akno nie adčyniaje i nie adčynić. Kałhaśnik pa svajoj mientalnaści i vychavańni z saŭkovymi zvyčkami pavodzin nie zdolny na šlachietnyja ŭčynki. A voś što piša Kaciaryna Andrejeva: «Miakkaja biełarusizacyja — heta całkam zrazumiełaja, pradumanaja i natural naja ŭ sučasnych hieapalityčnych umovach palityka našaj dziarža- vy. Baranić svajo, ale biez rezkich šturškoŭ, kab i susiedziaŭ nie pakryŭdzić».

Bacieńka rodny, kali ž heta biełarusy pazbuducca ŭ dušy chałopstva!

Jak kažuć, dazvol, akupancie, praspać pad łaŭkaj u svajoj chacie. Jakoha tam licha «Biełaruś adbyłasia»? Dastatkova tolki taho, bieź inšych faktaŭ, pad jakim imiem išli biełaruskija vajskovyja častki na paciešnym paradzie, jaki ŭzurpatar naładziŭ sabie.

Nievierahodna, ale biełaruskija vajskovyja častki maršyravali razam z rasiejskimi pad imiem Suvorava, Kutuzava. Biełaruskaja armija pieratvorana ŭ padraździaleńnie rasiejskaj armii, jakaja, pa jaho słovach, abaraniaje zachodniuju miažu Rasii.

Usie hetyja mytnyja pasty, abureńnia vykazvańni raźličany na jaho saŭkovy elektarat. Maskva ŭ luby momant svajho staŭlenika moža zamianić inšym, bolš spakojnym.

Biełaruski baćka bačyć, što Maskva stavicca časta da jaho jak pan da słužki. Ale ž jon sam davioŭ siabie da takoha stanu. Raz pradaŭsia — nazaŭždy paniavolenym zastaŭsia. Maskvu pakul zadavalniaje status Biełarusi-daminijona. Joj vyhadna mieć na mižnarodnaj arenie, jak i ŭ savieckija časy, jašče adzin hołas. 

Łukašenku i jaho pryśpiešnikaŭ niama kamu baranić, dyj nichto i nie budzie jaho baranić, kali Maskva vysadzić desant strałkovych. Što siejaŭ, toje i pažnie.

Łukašenka adčynić akno, kali: 1) padpiša ŭkaz, kab usie čynoŭniki za paŭhoda asvoili biełaruskuju movu; 2) padpiša ŭkaz ab skasavańni vynikaŭ tak zvanaha refierendumu ab movie, hierbie, ściahu; 3) padpiša ŭkaz ab vykanańni zakona «Ab movach», pryniataha Viarchoŭnym Savietam Biełarusi. Voś tady i pojdzie śviežaje pavietra biełarusizacyi. Voś tady Łukašenka stanie nacyjanalnym hierojem Biełarusi, a jaho partret budzie na hrašovych znakach jeŭrapiejskaj niezaležnaj Biełarusi. Historyja daruje.

Mikoła Vałoščyk, Biełaaziorsk

Ad redaktara

Čas pakaža, chto maje racyju: junaja Kacia Andrejeva, maładyja Marcinovič, Rudkoŭski ci Vy, spadar Vałoščyk, z Vašym hihanckim žyćciovym vopytam. Hałoŭnaje, što Vy čytajecie moładź, a jany čytajuć Vas. Dyj Alaksandr Łukašenka taksama «Našu Nivu» čytaje, dyk chaj viedaje, što ludzi dumajuć.

• 0
• 0
• 0
• 0
• 0
• 0
• 0
• 0