Maradona byŭ u śpisie imaviernych trenieraŭ zbornaj Biełarusi, ale staŭ Chackievič
Siońnia vykankam Biełaruskaj fiederacyi futboła zaćvierdziŭ imia novaha hałoŭnaha treniera nacyjanalnaj kamandy.
Im staŭ trenier ukrainskaha «Dynama-2» (druhi dyvizijon), słavuty biełaruski paŭabaronca Alaksandr Chackievič.
Pieršy namieśnik BFF Siarhiej Safarjan paviedamiŭ, z kim jašče vialisia pieramovy na pasadu treniera. Usiaho było ŭ śpisie mahčymych pretendentaŭ kala 30 proźvišč.
«U presie pieramovy aśviatlalisia padrabiazna. Dzieści praŭdziva, dzieści nie vielmi pieramovy na pasadu novaha treniera», — adznačyŭ staršynia BFF Siarhiej Rumas.
«Byli aktyŭnyja pieramovy ź Leanidam Kučukom. My nie dla ptušački sustrakalisia ź Viktaram Hančarenkam, jamu była zroblenaja prapanova. Razhladaŭsia jašče šerah kandydatur ź blizkaha zamiežža. Na nas vychodziŭ ahient Aleha Błachina. Anatol Dziamjanienka. Praz ahientaŭ byli samyja roznyja prapanovy ad Anciča da Maradony», — skazaŭ Siarhiej Safarjan.
Chackievič paviedamiŭ, što siarod pamočnikaŭ u štabie zbornaj budzie adzin zamiežnik. Pryčym nie ź blizkaha zamiežža. Niekatoryja siabry vykankama vykazvali dumku, što Chackievič nie bačyć pakul što kankretnaj stratehii raźvićcia zbornaj, tamu jaho treba zaćvierdzić u jakaści vykanaŭcy abaviazkaŭ.
Adnak u vyniku hałasavańnia 18 čałavieka prahałasavali za kandydaturu Chackieviča, ustrymaŭsia tolki adzin čałaviek (Jaŭhien Traciuk z Bresta), suprać nie było nikoha. Zbornaja Biełarusi atrymała novaha hałoŭnaha treniera.
Čytajcie: Piać faktaŭ pra novaha hałoŭnaha treniera futbolnaj zbornaj Alaksandra Chackieviča
Kamientary