U Baranavičach školnika na 8 hadoŭ adpravili ŭ kałoniju za spajsy
Za niezakonny abarot asabliva niebiaśpiečnych psichatropnych rečyvaŭ asudžany staršakłaśnik adnoj sa škoł horada Baranavičy.
Jak paviedamiła staršy prakuror adździeła prakuratury Bresckaj vobłaści Łarysa Karanievič,
16-hadovy dziesiacikłaśnik nabyŭ praź internet kurylnuju sumieś i 6 maja z metaj zbytu prynios jaje ŭ škołu, dzie vučyŭsia.
Tam ža supracoŭnikam milicyi ŭ jaho było kanfiskavana try palimiernyja pakieciki sa spajsam ahulnaj vahoj 18,19 hrama, što składała bolš za 100 razavych doz.
U dačynieńni da školnika raspačali kryminalnuju spravu. 10 červienia jaho ŭziali pad vartu.
16 vieraśnia sud Baranavickaha rajona i horada Baranavičy pryznaŭ staršakłaśnika vinavatym u niezakonnym z metaj zbytu nabyćci i zachoŭvańni asabliva niebiaśpiečnaha psichatropnaha rečyva na terytoryi ŭstanovy adukacyi (č. 3 art. 328 KK) i pryhavaryŭ da vaśmi hadoŭ pazbaŭleńnia voli z adbyvańniem pakarańnia ŭ vychavaŭčaj kałonii.
Sudovaja kalehija pa kryminalnych spravach Bresckaha abłasnoha suda 21 listapada pakinuła bieź źmieny pryhavor, i jon nabyŭ zakonnuju moc.
Jak zaznačyła Karanievič, raniej školnik traplaŭ u pole zroku supracoŭnikaŭ pravaachoŭnych orhanaŭ. U listapadzie 2013 hoda ŭ jaho było znojdziena piać pustych palimiernych pakiecikaŭ z-pad spajsaŭ.
Kamientary