Prejhierman: Biełaruś stanovicca ŭschodniejeŭrapiejskaj Šviejcaryjaj

Biełaruś nabyvaje status pastajannaj placoŭki dla pieramoŭ pa ŭkrainskim kanflikcie, što palapšaje imidž Minska na suśvietnaj arenie. Takim bačać hałoŭny vynik siońniašnich pieramoŭ u Minsku ŭ farmacie Mytny sajuz — Ukraina — ES dla biełaruskaha boku niezaležnyja ekśpierty. 

Na dumku staršaha analityka Biełaruskaha instytuta stratehičnych daśledavańniaŭ (BISS) Dzianisa Mieljancova, možna kanstatavać pačatak pieramoŭnaha pracesu. «Pakul vyniki čakanyja — nijakich istotnych damoŭlenaściaŭ nie było dasiahnuta. Ale i nie było nijakich demaršaŭ, nichto dźviarami nie hruknuŭ, ruku za śpinu nie schavaŭ», — padkreśliŭ palitołah u kamientary BiełaPAN. «Samyja važnyja vyniki siońniašniaha dnia — heta pocisk ruki Pucina i Parašenki, sam fakt sustrečy i toje, što Minsk stanovicca rehularnaj placoŭkaj dla kantaktnaj hrupy ŭ farmacie Ukraina — Rasija — ABSIE, što źjaŭlajecca vyjhryšam dla Biełarusi», — ličyć ekśpiert. «Dadzieny start «minskamu pracesu», čym by jon ni byŭ», — dadaŭ Mieljancoŭ. 

Jaho acenku ŭ cełym padzialaje dyrektar pa daśledavańniach «Libieralnaha kłuba» Jaŭhien Prejhierman. «Vynik zaklučajecca ŭžo ŭ tym, što adbyłasia sama heta sustreča, sfarmulavana choć niejkaja ahulnaja pazicyja i moža pačacca niejki ruch pa abstraktnaj darožnaj karcie», — skazaŭ jon. 

«Pakładzieny pačatak choć by niejkim ahulnafarmatnym pieramovam, i heta ŭ lubym vypadku važna dla rašeńnia jak niepasredna kanfliktu na Danbasie, tak i bolš hłabalnych rečaŭ vybudoŭvańnia sistemy biaśpieki na jeŭrapiejskim kantyniencie», — adznačyŭ ekśpiert. 

Kažučy pra nastupstvy sustrečy dla aficyjnaha Minska, ekśpierty byli aptymistyčnyja. 

Na dumku Mieljancova, dla Biełarusi «ŭsio prajšło navat bolš čym dobra». «Adbyłasia dvuchbakovaja sustreča Ketryn Eštan i Alaksandra Łukašenki. Na joj Eštan skazała tyja słovy, jakija, miarkujučy pa ŭsim, biełaruski kiraŭnik chacieŭ ad jaje pačuć. Jana padziakavała Łukašenku za toje, što jaje zaprasili i pryniali. Było zrazumieła, što biełaruskamu prezidentu heta vielmi važna i pryjemna», — skazaŭ analityk. 

«Usie astatnija ŭdzielniki pieramoŭ taksama vykazalisia ab tym, što Alaksandr Łukašenka syhraŭ važnuju rolu ŭ tym, što adbyłasia heta sustreča», — dadaŭ Mieljancoŭ. Akramia taho, padkreśliŭ jon, uvaha «najbujniejšych suśvietnych ŚMI prykavanaja da Minska, jak da miesca, dzie, jak skazaŭ Piatro Parašenka, vyrašajecca los śvietu i Jeŭropy». «Va ŭmovach, kali Biełaruś znachodzicca ŭ mižnarodnaj izalacyi, takaja padzieja, takija sustrečy — heta biezumoŭna vielmi važnaja i značnaja padzieja dla krainy», — reziumavaŭ Mieljancoŭ. 

Na dumku Jaŭhiena Prejhiermana, «toje, što adbyłosia, a asabliva kali, jak było zajaŭlena, pieramovy buduć praciahvacca ŭ niejkim farmacie ŭ Minsku, heta pieratvareńnie va «ŭschodniejeŭrapiejskuju Šviejcaryju». «A status «uschodniejeŭrapiejskaj Šviejcaryi» — heta nie status apošniaj dyktatury Jeŭropy i jeŭrapiejskaha izhoja», — zaŭvažyŭ ekśpiert. «Na druhi i treci płan adychodziać šmatlikija prablemy ŭ adnosinach Minska i Brusiela, u tym liku prablema palitźniavolenych. Heta nie značyć, što prama ciapier pačniecca luboŭ, i biełaruskaha prezidenta buduć całavać u Jeŭrapiejskim sajuzie, ale heta — jakasna inšy ŭzrovień uzajemadziejańnia. Kali ŭ budučyni budzie zachodzić havorka, skažam, pra niejkija finansavyja pytańni, to heta plus u karmu Biełarusi», — pierakanany Prejhierman.

• 0
• 0
• 0
• 0
• 0
• 0
• 0
• 0