Беларусь набывае статус пастаяннай пляцоўкі для перамоў па ўкраінскім канфлікце, што паляпшае імідж Мінска на сусветнай арэне. Такім бачаць галоўны вынік сённяшніх перамоў у Мінску ў фармаце Мытны саюз — Украіна — ЕС для беларускага боку незалежныя эксперты.
На думку старшага аналітыка Беларускага інстытута стратэгічных даследаванняў (BISS) Дзяніса Мельянцова, можна канстатаваць пачатак перамоўнага працэсу. «Пакуль вынікі чаканыя — ніякіх істотных дамоўленасцяў не было дасягнута. Але і не было ніякіх дэмаршаў, ніхто дзвярамі не грукнуў, руку за спіну не схаваў», — падкрэсліў палітолаг у каментары БелаПАН. «Самыя важныя вынікі сённяшняга дня — гэта поціск рукі Пуціна і Парашэнкі, сам факт сустрэчы і тое, што Мінск становіцца рэгулярнай пляцоўкай для кантактнай групы ў фармаце Украіна — Расія — АБСЕ, што з'яўляецца выйгрышам для Беларусі», — лічыць эксперт. «Дадзены старт «мінскаму працэсу», чым бы ён ні быў», — дадаў Мельянцоў.
Яго ацэнку ў цэлым падзяляе дырэктар па даследаваннях «Ліберальнага клуба» Яўген Прэйгерман. «Вынік заключаецца ўжо ў тым, што адбылася сама гэта сустрэча, сфармулявана хоць нейкая агульная пазіцыя і можа пачацца нейкі рух па абстрактнай дарожнай карце», — сказаў ён.
«Пакладзены пачатак хоць бы нейкім агульнафарматным перамовам, і гэта ў любым выпадку важна для рашэння як непасрэдна канфлікту на Данбасе, так і больш глабальных рэчаў выбудоўвання сістэмы бяспекі на еўрапейскім кантыненце», — адзначыў эксперт.
Кажучы пра наступствы сустрэчы для афіцыйнага Мінска, эксперты былі аптымістычныя.
На думку Мельянцова, для Беларусі «ўсё прайшло нават больш чым добра». «Адбылася двухбаковая сустрэча Кэтрын Эштан і Аляксандра Лукашэнкі. На ёй Эштан сказала тыя словы, якія, мяркуючы па ўсім, беларускі кіраўнік хацеў ад яе пачуць. Яна падзякавала Лукашэнку за тое, што яе запрасілі і прынялі. Было зразумела, што беларускаму прэзідэнту гэта вельмі важна і прыемна», — сказаў аналітык.
«Усе астатнія ўдзельнікі перамоў таксама выказаліся аб тым, што Аляксандр Лукашэнка сыграў важную ролю ў тым, што адбылася гэта сустрэча», — дадаў Мельянцоў. Акрамя таго, падкрэсліў ён, увага «найбуйнейшых сусветных СМІ прыкаваная да Мінска, як да месца, дзе, як сказаў Пятро Парашэнка, вырашаецца лёс свету і Еўропы». «Ва ўмовах, калі Беларусь знаходзіцца ў міжнароднай ізаляцыі, такая падзея, такія сустрэчы — гэта безумоўна вельмі важная і значная падзея для краіны», — рэзюмаваў Мельянцоў.
На думку Яўгена Прэйгермана, «тое, што адбылося, а асабліва калі, як было заяўлена, перамовы будуць працягвацца ў нейкім фармаце ў Мінску, гэта ператварэнне ва «ўсходнееўрапейскую Швейцарыю». «А статус «усходнееўрапейскай Швейцарыі» — гэта не статус апошняй дыктатуры Еўропы і еўрапейскага ізгоя», — заўважыў эксперт. «На другі і трэці план адыходзяць шматлікія праблемы ў адносінах Мінска і Бруселя, у тым ліку праблема палітзняволеных. Гэта не значыць, што прама цяпер пачнецца любоў, і беларускага прэзідэнта будуць цалаваць у Еўрапейскім саюзе, але гэта — якасна іншы ўзровень узаемадзеяння. Калі ў будучыні будзе заходзіць гаворка, скажам, пра нейкія фінансавыя пытанні, то гэта плюс у карму Беларусі», — перакананы Прэйгерман.
Цяпер чытаюць
На пратэстанцкі фестываль у «Чыжоўку-Арэну» едзе амерыканскі прапаведнік Франклін Грэм. Разам з ім чакаюць Коўла з жонкай8
Каментары