Tramp zajaviŭ, što «Prajekt Svaboda» u Armuzskim pralivie budzie prypynieny

Prezident ZŠA Donald Tramp zajaviŭ, što apieracyja pa supravadžeńni zatrymanych u Piersidskim zalivie sudnaŭ budzie prypynienaja na «karotki pramiežak času», kab acanić mahčymaść zaklučeńnia mirnaha pahadnieńnia z Tehieranam, piša Bi-bi-si.

Pa jaho słovach, «Prajekt Svaboda», realizacyja jakoha pačałasia ŭ paniadziełak, budzie prypynieny pa prośbie Pakistana, jaki vystupaje pasrednikam na pieramovach, a taksama inšych krain.

Tramp napisaŭ u Truth Social, što rašeńnie było pryniata ŭ suviazi z «vielizarnymi vajennymi pośpiechami» i «značnym prahresam» u dasiahnieńni mirnaha pahadnieńnia ź Iranam.

«Pakul błakada budzie zachoŭvacca, «Prajekt Svaboda» (prapusk sudnaŭ praz Armuzski praliŭ) budzie prypynieny na karotki pramiežak času, kab vyśvietlić, ci ŭdasca zaviaršyć i padpisać pahadnieńnie», — dadaŭ jon.

Ceny na naftu niaznačna źnizilisia na pačatku tarhoŭ u Azii ŭ sieradu na fonie zajaŭleńniaŭ Trampa.

Iranskija dziaržaŭnyja ŚMI zajavili, što prypynieńnie apieracyi śviedčyć ab tym, što Tramp «adstupiŭ» paśla sieryi niaŭdač u sprobach razbłakavać žyćciova važny dla suśvietnaha sudnachodstva vodny šlach.

Zajava Trampa prahučała nieŭzabavie paśla taho, jak dziaržsakratar ZŠA Marko Rubia zajaviŭ na bryfinhu ŭ Biełym domie, što apieracyja «Epičny hnieŭ», jakaja pačałasia ŭ kancy lutaha, dasiahnuła svaich metaŭ, i Vašynhton pierachodzić da nastupnaha etapu, to bok «Prajektu Svaboda».

«My addali pieravahu šlachu miru. Prezident addaŭ by pieravahu zaklučyć pahadnieńnie», — skazaŭ kiraŭnik Dziarždepa ŭ aŭtorak viečaram.

Kažučy ab prajekcie, Rubia adznačyŭ, što jon nosić vyklučna abarončy charaktar. «Stralby nie budzie, pakul u nas nie strelać pieršymi», — dadaŭ jon.

Raniej Centralnaje kamandavańnie ZŠA (CENTCOM) zajaŭlała, što ŭ apieracyi pa supravadžeńni sudnaŭ buduć zadziejničany eśmincy, samaloty i 15 tysiač vajskoŭcaŭ.

Hienierał Den Kiejn, staršynia Abjadnanaha kamiteta načalnikaŭ štaboŭ, zajaviŭ u aŭtorak, što ŭ Piersidskim zalivie zabłakavana bolš za 1 500 sudnaŭ, na borcie jakich znachodzicca pryblizna 22 500 marakoŭ. 

Zajavy Vašynhtona prahučali na fonie sieryi atak u Armuzskim pralivie — heta vyklikała aściarohi, što pieramirje znachodzicca pad pahrozaj zryvu. ZŠA zajavili, što ich meta — vyvieści zatrymannyja sudny ź Piersidskaha zaliva.

U paniadziełak Tramp zajaviŭ, što Iran budzie «źniesieny z tvaru Ziamli», kali pasprabuje atakavać amierykanskija sudy, jakija ŭdzielničajuć u apieracyi.

Tehieran apošnija zajavy ZŠA pakul nie kamientavaŭ, adnak śpikier iranskaha parłamienta Machamied-Bahier Halibaf zajaŭlaŭ u aŭtorak, što ZŠA i sajuźniki pastavili pad pahrozu biaśpieku sudnachodstva ŭ pralivie «z-za parušeńniaŭ režymu spynieńnia ahniu i ŭviadzieńnia błakady» suprać Irana.

«Adnak ich zładziejstvy nie ŭviančajucca pośpiecham», — skazaŭ jon.

Poźnia ŭviečary ŭ aŭtorak Upraŭleńnie marskich handlovych apieracyj Vialikabrytanii paviedamiła sa spasyłkaj na krynicy, što ŭ Armuzskim pralivie hruzavoje sudno było paražanaje «nieviadomym snaradam». Bolš padrabiaznaj infarmacyi pra incydent pakul niama.

U aŭtorak ułady Abjadnanych Arabskich Emirataŭ zajavili, što ich sistemy SPA druhi dzień zapar pierachoplivajuć iranskija rakiety i drony, nazvaŭšy heta niebiaśpiečnaj eskałacyjaj. Iran admaŭlaje, što nanosiŭ udary pa AAE.

Apieracyja «Epičny hnieŭ» pačałasia 28 lutaha, kali ZŠA i Izrail nanieśli sieryju avijaŭdaraŭ pa Iranie. Tehieran zabłakavaŭ Armuzski praliŭ, pa jakim da vajny prachodziła kala 20% suśvietnych pastavak nafty i zvadkavanaha pryrodnaha hazu.

• 0
• 0
• 2
• 3
• 0
• 1
• 0
• 0