Słuckuju aktyvistku aštrafavali za pakaz filma pra Słucki zbrojny čyn
Na 20 bazavych vieličyń (2 miljona 600 tysiač rubloŭ) aštrafavanaja sudom Słuckaha rajonu aktyvistka Zinaida Cimošak pavodle artykułu ab «parušeńni paradku arhanizacyi praviadzieńnia schodaŭ».
Padstavaj dla hetaha stałasia sproba pravieści kinaprahlad dakumentalnaj stužki «40 dzion sialanskaj respubliki», pryśviečanaj Słuckamu zbrojnamu čynu, u domie kultury vioski Kazłovičy 23 listapada, paviedamlaje radyjo «Svaboda».
Prahlad byŭ prymierkavany da čarhovych uhodkaŭ Słuckaha zbrojnaha čynu. Udzieł u imprezie prymała historyk Nina Stužynskaja, adna z aŭtarak filma. Adnak miascovyja milicyjanty sarvali kinaprahlad: zatrymali udzielnikaŭ, praviali dopyty ŭdzielnikaŭ imprezy, a na arhanizatarku Zinaidu Cimošak skłali administracyjny pratakoł. Na znak pratestu zahadčyk domu kultury vioski Kazłovičy Alaksandar Tumiłovič pakinuŭ svaju pasadu.
19 śniežnia padčas sudu Alaksandar Tumiłovič zajaviŭ:
«Heta film pra Słuckaje paŭstańnie, jaki byŭ pakazany pa ANT, z kamentarom historyka. Ja pahadziŭsia, prapanavaŭ maleńkuju zalu, na 25-30 čałaviek. U mianie jość takaja forma pracy, jak sustreča ź cikavymi ludźmi. Tym bolš što kramoły ja nia baču, bo film byŭ pakazany pa dziaržaŭnym telekanale. Z načalstvam na toj momant ja nia moh źviazacca, i ŭziaŭ na siabie adkaznaść za dazvoł. Da 3 hadzinaŭ 23-ha jany pryjechali, ja paznajomiŭsia ź Zinaidaj Cimošak i Ninaj Stužynskaj. Potym ludzi pajšli. A praź niekalki chvilinaŭ źjaviŭsia i AMAP».
Adnak sudździa Śviatłana Pastuchova nie prysłuchałasia da słovaŭ śviedki i pryznała Zinaidu Cimošak vinavataj.
Pra vinu Cimošak Tumiłovič kaža: «A pry čym tut jana, kali ja jaje zaprasiŭ?»
Ciapier čytajuć
Byłoha milicyjaniera asudzili za žadańnie vajavać u Pałku Kalinoŭskaha. Pahražała da 15 hadoŭ kałonii11
Kamientary