Infarmacyja ab hetym raźmieščana na sajcie catholic.by
«Apostalskaja Nuncyjatura ŭ Respublicy Biełaruś była prainfarmavana kampietentnymi orhanami krainy ab tym, što niama bolš padstavaŭ dla dalejšaha ŭtrymańnia ksiandza Uładzisłava Łazara ŭ śledčym izalatary KDB.
Było pryniata rašeńnie, što padčas śledstva, jakoje jašče praciahvajecca, śviatar pavinien znachodzicca ŭ pastajannym miescy, majučy svabodu pieramiaščeńnia i dziejańnia, pavodle vyznačanych normaŭ, z abaviazkam štodzionnaj rehistracyi ŭ adździaleńni milicyi.
Apostalskaha Nuncyja paprasili zabrać ksiandza Łazara sa śledčaha izalatara KDB».
***
Pra zatrymańnie ksiandza stała viadoma paśla taho, jak Alaksandr Łukašenka 26 lipienia paviedamiŭ žurnalistam, što supracoŭnik biełaruskich śpiecsłužbaŭ zatrymany za pracu na zamiežnyja dziaržavy.
«My niadaŭna zatrymali adnaho sa zdradnikaŭ, jaki ŭ śpiecsłužbach słužyŭ i jaki byŭ praz pradstaŭnikoŭ katalickaj carkvy źviazany z zamiežnymi dziaržavami, i nie tolki zdavaŭ infarmacyju, ale z-za jaho dziejnaści paciarpieli ludzi, jakija pracujuć za miažoj», — skazaŭ tady Łukašenka.
29 lipienia infarmacyju pra zatrymańnie ksiandza Łazara paćvierdziŭ pradstaŭnik Rymska-katalickaha kaścioła ŭ Biełarusi.
Paźniej, sa spasyłkaj na Katalicki kaścioł, stała viadoma, što ksiandzu U. Łazaru stavicca ŭ vinu pieradača hrošaj i materyjalnych kaštoŭnaściej čałavieku, jaki abvinavačvajecca ŭ špijanažy na karyść inšaj dziaržavy. Jon abvinavačvajecca pavodle p. 1 art. 356 Kryminalnaha kodeksa (zdrada dziaržavie). Jaho kryminalnaja adkaznaść vyznačajecca p. 6 art. 16 KK (sadziejničańnie ŭ złačynstvie), što praduhledžvaje termin pakarańnia ad 7 da 15 hadoŭ. Ks. U. Łazar ŭtrymlivaŭsia ŭ turmie SIZA KDB u Minsku. Infarmacyju pra heta raspaŭsiudziła Kanfierencyja katalickich biskupaŭ Biełarusi 12 vieraśnia.
Sprava ks. Łazara abmiarkoŭvałasia na sustrečy Apostalskaha nuncyja Kłaŭdya Hudžeroci z Papam Franciškam, 25 kastryčnika nuncyja sustreŭsia z Uładzisłavam Łazaram u SIZA KDB.
Ksiondz Uładzisłaŭ Łazar — hramadzianin Biełarusi, vučyŭsia ŭ Hrodzienskaj sieminaryi, zatym u Polščy. U krasaviku hetaha hoda byŭ pryznačany administrataram z pravami probašča parafii Spasłańnia Duchu Śviatoha ŭ Barysavie. Raniej słužyŭ u Mar`inaj Horcy i Rudziensku (Puchavicki rajon Minskaj vobłaści)
Kamientary