«Z-za šerahu incydentaŭ, sutyknieńniaŭ było pryniata rašeńnie ab adciaśnieńni ludziej z majdana Niezaležnaści», — rastłumačyli ŭ milicyi. Razhon adbyŭsia kala 4-j hadziny ranku, kali na Płoščy była najmienš ludziej — usiaho niekalki socień.
Učora ŭviečary na Majdanie sabrałasia kala 50 tysiač čałaviek. Adnak na načoŭku na płoščy zastajucca tolki samyja adčajuhi, pieravažna studenty.
«Lehli spać va Ukrainie, a pračnulisia ŭ Biełarusi», — tak prakamientavaŭ padziei były ministr abarony Ukrainy Anatol Hrycenka.
Ale ž roźnica jość: u Minsku ŭ časie razhonu apošniaj Płoščy za kratami apynulisia bolš za 1000 čałaviek. U Kijevie ličba zatrymanych była našmat mienšaj, dyj tych adpuścili.
31 čałaviek zatrymany, bolšaść ź ich adpuścili paśla składańnia administracyjnych pratakołaŭ. 7 udzielnikaŭ Majdana paśla sutyčak trapili ŭ špital.
Ciapier Majdan ačepleny śpiecnazam. Tam dziažuryć adna mašyna «Chutkaj dapamohi», płošču prybirajuć, jeździać palivalnyja mašyny. Kirujuć pracesam ludzi ŭ cyvilnym. Aktyvistaŭ adcisnuli ŭ padziemny pierachod, paviedamlaje «Ukrainskaja praŭda».
Były pasoł ZŠA va Ukrainie Styven Pajfier asudziŭ razhon Jeŭramajdanu. Jon miarkuje, što heta moža ŭdaryć pa adnosinach Ukrainy i ES.
Lidar apazicyi Arsień Jacaniuk zajaviŭ, što znos namiotavaha miastečka nie mianiaje płanaŭ apazicyi. U niadzielu 1 śniežnia jana sklikaje ŭ Kijevie vialikaje Narodnaje vieča, na jakim maje zaćvierdzić płan dalejšych dziejańniaŭ.
Kamientary