Hramadskaść prosić ułady Hiermanii i Aŭstryi prafinansavać budaŭnictva miemaryjała ŭ Traściancy

Z prośbaj prafinansavać budaŭnictva miemaryjalnaha kompleksu va ŭročyščy Błahaŭščyna kala byłoha łahiera śmierci «Traścianiec» vystupili ŭdzielniki mižnarodnaj kanfierencyi «Łahier śmierci Traścianiec u jeŭrapiejskaj pamiaci», jakaja prachodzić 23–24 sakavika ŭ Minsku.

Raspracoŭkaj prajekta miemaryjała ŭ Błahaŭščynie zajmałasia kampietentnaje koła asob ad hramadskich arhanizacyj Biełarusi, Hiermanii, Aŭstryi i Čechii pad kiraŭnictvam staršyni jaŭrejskich arhanizacyj i abščyn Biełarusi, člena mižnarodnaj akademii architektaraŭ Leanida Levina. Pavodle acenak śpiecyjalistaŭ,

na budaŭnictva hetaha kompleksu spatrebicca bolš jak 700 tys. jeŭra i piać hadoŭ pracy.

«Pra Minskaje hieta i łahier śmierci „Traścianiec“ mała što viadoma ŭ mižnarodnym maštabie, a ŭ jeŭrapiejskaj kultury pamiaci jany vykonvajuć tolki druharadnuju rolu, — adznačajecca ŭ zajavie. — My z padziakaj adznačajem, što ŭłady Minska vydzielili na stvareńnie pomnika achviaram łahiera „Traścianiec“ płošču ŭ 100 ha i vitajem inicyjatyvu abjadnańniaŭ pa stvareńni pomnika ŭ Błahaŭščynie dla ŭviekaviečvańnia pamiaci jaŭrejaŭ, departavanych z Hiermanii i Aŭstryi. Heta pamiatnaje miesca pavinna stać častkaj budučaha miemaryjalnaha kompleksu ŭ Traściancy».

U svajoj zajavie ŭdzielniki kanfierencyi prosiać «adkaznych palitykaŭ u Hiermanii i Aŭstryi pravieści intensiŭnaje abmierkavańnie prajekta» i vydzielić dla jaho realizacyi finansavyja srodki. Akramia taho, aŭtary dakumienta prosiać ułady Minska ŭklučyć prajekt miemaryjała ŭ Błahaŭščynie ŭ prajekt kompleksu «Traścianiec», «zrabić ekśpiertnuju acenku i ŭchvalić prajekt Leanida Levina».

U zvarocie taksama ŭtrymlivajecca prośba da palitykaŭ Biełarusi, Hiermanii i Aŭstryi «ŭrehulavać praz adpaviednaje pahadnieńnie pytańni abmienu krynicami infarmacyi i dakumientami pa historyi Minskaha hieta i łahiera śmierci «Traścianiec».

Uziać šefstva nad prajektam i vystupić za jaho najchutčejšuju realizacyju aŭtary dakumienta prosiać kiraŭnika Biełaruskaj pravasłaŭnaj carkvy, mitrapalita Minskaha i Słuckaha Fiłareta, patryjaršaha ekzarcha ŭsiaje Biełarusi, mitrapalita Minska-MahiloŭskahaRymska-katalickaj carkvy archibiskupa Tadevuša Kandrusieviča i niamieckaha palityka Chieninha Šerfa.

«My spadziajomsia, što ŭ 2014 hodzie, u hod 70-hodździa vyzvaleńnia Biełarusi, budzie zakładzieny pieršy kamień u padmurak pomnika ŭ Błahaŭščynie», — havorać aŭtary zvarotu.

U časy dziejańnia łahiera śmierci «Traścianiec» va ŭročyščy Błahaŭščyna znachodziłasia miesca masavaha pakarańnia śmierciu i pachavańnia partyzan, vajennapałonnych i mirnych žycharoŭ, departavanych z roznych krain.

• 0
• 0
• 0
• 0
• 0
• 0
• 0
• 0