Pucina nia budzie

Zamiežnaja presa pieramyvaje kostki novym kramloŭskim favarytam.

Prezydenckaja honka ŭ Rasiei pačałasia — takuju vysnovu robiać žurnalisty bujnych vydańniaŭ. Ministar abarony Siarhiej Ivanoŭ zrabiŭsia pa sumiaščalnictvie vice-premjeram, a kiraŭnik prezydenckaj administracyi Dźmitry Miadźviedzieŭ pierasieŭ na kresła vice-premjera, sastupiŭšy byłuju pasadu ciumienskamu hubernataru Siarhieju Sabianinu. Chto ź ich maje najbolšyja šancy sieści na miesca Pucina ŭ 2008 h.?

I biaźmiežnaja viernaść patronu

Brytanskaja «Hardyjan» nazyvaje toje, što adbyłosia, «niečakanaj pieratasoŭkaj»: «Pucin upieršyniu zrabiŭ adkryty namiok na toje, kamu, mahčyma, jon davieryć uładu ŭ 2008 h.». Na dumku «Hardyjan», chod Pucina dapamoža zapoŭnić palityčny vakuŭm, jaki ŭtvaryŭsia praź biaździejańnie Kramla i aktyvizacyju apanentaŭ rasiejskaha prezydenta. «Hardyjan» adznačaje viernaść Kramla tradycyi stavić na vysokija pasady małaviadomych palitykaŭ kštałtu ciumienskaha hubernatara Siarhieja Sabianina. Razam z tym pierastanoŭki nie abiacajuć ničoha dobraha premjeru Fradkovu, jakomu daviadziecca prastavać darohu kamuści ź vice-premjeraŭ, uziaŭšy na svaje plečy ciažar viny za palityčnyja niaŭdačy apošniaha času.

«Hardyjan» pryvodzić słovy ananimnaj krynicy ŭ Kramli, pavodle jakoj najbolšyja šancy zrabicca pierajemnikami Pucina majuć Miadźviedzieŭ i Ivanoŭ. Pry roźnicy charaktaraŭ ich abjadnoŭvaje biaźmiežnaja lajalnaść patronu. Pry hetym Pucin maje bolš blizkija dačynieńni ź Ivanovym, čym z adnosna maładym Miadźviedzievym.

«Hardyjan» robić nastupnuju vysnovu: pierastanoŭki va ŭradzie Rasiei syhnalizujuć pra toje, što pamiarkoŭnyja kalakramloŭskija koły atrymali pieramohu nad siłavikami savieckaj zahartoŭki.

Chod tryma fihurami

U adroźnieńnie ad «Hardyjan», jakaja śćviardžaje, što Ivanoŭ nia rviecca ŭ prezydenckaje kresła, žurnalisty «Tajmz» pradkazvajuć žorstkuju baraćbu pamiž Siarhiejem Ivanovym i Dźmitryjem Miadźviedzievym. Hazeta taksama pastaviła kryž na «blakłym» Fradkovie, ad jakoha Pucin «pazbavicca ŭ nastupnym hodzie, kali prezydenckaja kampanija nabiare abaroty». Za dva hady da vybaraŭ prezydenckaja honka pačałasia — piša «Tajmz». Hety čas budzie skarystany dla raskrutki nia nadta viadomaha Dźmitryja Miadźviedzieva.

Žurnalisty brytanskaj «Fajnenšyjał Tajmz» taksama miarkujuć, što Pucin stavić na Miadźviedzieva. S.Ivanovu daviadziecca zadavolicca rolaj «rezervovaha kandydata», jaki ŭstupić u baraćbu tolki tady, kali z honki pa toj ci inšaj pryčynie vybudzie hałoŭny favaryt.

«Asašyjejted Pres» nazyvaje kadravyja rašeńni rasiejskaha prezydenta chodam tryma fihurami. A toje, što da vybaraŭ jašče žyć dy žyć, značyć, što Ivanovu i Miadźviedzievu dali vyprabavalny termin, za jaki jany pavinny pakazać, na što zdatnyja. Tamu ličyć ich pretendentami na honar nazyvacca pierajemnikami Pucina zanadta rana. A Siarhiej Ivanoŭ, na jakim kamieniem lažyć ciažar patanułaha «Kursku», naahuł maje nievialikija šancy atrymać padtrymku nasielnictva.

«Fajnenšyjał Tajmz» nazyvaje Miadźviedzieva «najbolš lajalnym prysłužnikam Pucina» i miarkuje, što «pryznačeńnie jaho pierajemnikam pryviadzie da minimalnych ci naahuł nulavych pieramien u palitycy Pucina, a ŭłada zastaniecca ŭ rukach kramloŭskich viarchoŭ». Novy pieršy vice-premjer atrymaje niebłahuju foru: miesiac tamu Pucin pryznačyŭ Miadźviedzieva kiraŭnikom Savietu nacyjanalnych prajektaŭ — orhanu, jaki budzie raźmiarkoŭvać miljardy dalaraŭ dla vykanańnia sacyjalnych dy infrastrukturnych prajektaŭ.

«Fajnenšyjał Tajmz Dojčland» zhadžajecca: Pucin daŭ start prezydenckaj kampanii. Adnak synchronnyja pryznačeńni havorać i pra toje, što prezydent vahajecca nakont kandydatury pierajemnika — inakš pavyšeńnie atrymała b tolki adna asoba. I Pucina, i Miadźviedzieva, i Ivanova źviazvaje miesca naradžeńnia — usie jany «picierskija».

Vydańnie adznačaje, što Pucin taksama zrabiŭsia prezydentam pa pryznačeńni — dziakujučy Jelcynu. Pry hetym jon užo paśpieŭ «źniać z dystancyi» takoha niebiaśpiečnaha supiernika, jak Michaił Chadarkoŭski, jaki ciapier siadzić za drotam u Sibiry.

Pierastanoŭki va ŭradzie — pieršy krok da vyznačeńnia pierajemnika Pucina ŭ 2008 h., padvodzić rysu «Frankfurter Alhiemajne Cajtunh».

«Noje Curcher Cajtunh» iranizuje z nahody svojeasablivaha adradžeńnia manarchičnych tradycyj pierajemnaści ŭłady ŭ Rasiei: «Takim čynam, Dźmitry Miadźviedzieŭ vyłučajecca ŭ pieršy šerah patencyjnych kronpryncaŭ». Švajcarskaja hazeta ŭkazvaje na toje, što Pucin zahadaŭ nakiravać značnuju častku dachodaŭ ad prodažy syraviny na razbudovu nacyjanalnaj infrastruktury, palapšeńnie systemy achovy zdaroŭja i adukacyi. Mienavita za hetyja sfery ciapier i budzie adkazvać Miadźviedzieŭ, što daść jamu mahčymaść «stvaryć svoj vobraz u vačach hramadzkaści».

Hazeta adznačaje, što ciesna źviazny z «Hazpromam» liberalny technakrat Miadźviedzieŭ ličycca adnym z hałoŭnych apanentaŭ hrupy pad umoŭnaj nazvaj «siłaviki». Adnak kančatkova los «kronprynca Miadźviedzieva» vyrašycca nie raniej za 2008 h., «a da taho času moža šmat čaho adbycca», piša hazeta.

Jak i bolšaść rasiejskich vydańniaŭ, «Iźviestija» sprabujuć adkazać na pytańnie: «Što aznačajuć kadravyja pierastanoŭki va ŭładzie?»

Rasiejskimi vačyma

«Nia vyklučana, što dla Miadźviedzieva nastaŭ čas stažyroŭki pierad skačkom na pasadu premjer-ministra i, kali ŭ jaho ŭsio pojdzie dobra, jon zrobicca prafilujučym kandydatam u pierajemniki». Ivanova hazeta nazyvaje «zapasnoj kandydaturaj». Pryznačeńnie kiraŭnikom prezydenckaj administracyi S.Sabianina «Iźviestija» tłumačać patrebaj Pucina ŭ čałavieku, «maksymalna dalokim ad kramloŭskich raskładaŭ», jaki da taho ž maje suviazi z rehijanalnymi elitami.

«Pucin moža razhladzieć kadry navat praz čornyja akulary», — piša «Komsomolskaja pravda» i nazyvaje prezydenckija rašeńni «samaj maštabnaj pierastanoŭkaj fihur na vialikaj palityčnaj mapie Rasiei za apošnija piać hod».

Hazeta nie vyklučaje, što adnoj z funkcyj Miadźviedzieva moža być padrychtoŭka hleby dla pierachodu Pucina na pasadu premjera paśla zakančeńnia terminu jaho prezydenctva.

«Niezavisimaja hazieta» źmiaščaje materyjał pad zahałoŭkam «Miadźviedzieva kinuli na Bieły dom». Pierastanoŭki jana taksama charaktaryzuje jak «specaperacyju «Pierajemnik». Hazeta nie vyklučaje mahčymaści taho, što Pucin prosta vypraboŭvaje źviazku Miadźviedzieŭ—Ivanoŭ u jakaści haspadaroŭ Kramla i Biełaha domu. Razam z tym, vydańnie zaścierahaje ad kančatkovych vysnoŭ: Pucin zaŭždy dziejničaje pa niepradkazalnym scenary.

«Napaŭpierajemniki» — takuju mianušku padabrała hazeta «Kommiersant'» dla Ivanova i Miadźviedzieva. Vydańnie prytrymlivajecca dumki, što im jašče daviadziecca šmat papracavać, kab davieści, što jany hatovy zamianić Pucina ŭ 2008 h.

Na dumku žurnalistaŭ «Kommiersanta», havorka idzie nia prosta pra kadravyja rakiroŭki, a pra źmieny ŭ samoj kanstrukcyi vykanačaj ułady — «mały pieravarot». Urad, jaki paśpieŭ pieratvarycca ŭ biezdapamožny techničny orhan, značna ŭzmocnicca z prychodam u jaho ludziej Pucina. Adpaviedna, varta čakać pasłableńnia pazycyj prezydenckaj administracyi.

«Moskovskij komsomolec» nie vyklučaje, što Miadźviedzieva mahli pryznačyć «aŭralnym metadam» — u suviazi z paharšeńniem stanu zdaroŭja M.Fradkova. Kresła pieršaha vice-premjera — «publičnaja, usimi viatrami prastrelvanaja pasada». Pryznačeńnie niasie ŭ sabie niebiaśpieku dla Miadźviedzieva: usio-taki Pucin budzie prymać kančatkovaje rašeńnie pra pierajemnika tolki praz dva hady.

Praŭradavaja «Rośsijskaja hazieta» nazvała kadravyja pryznačeńni nia mienš jak sensacyjaj, adnak tłumačyć jaje sens davoli ćmiana. Pavodle vydańnia, hałoŭnaja intryha zaklučałasia ŭ tym, kaho pryznačać adkaznym za vykanańnie «pryjarytetnych nacyjanalnych prajektaŭ». Hazeta zachaplajecca stylem raptoŭnych kadravych rašeńniaŭ prezydenta i tajamničym vyrazam jaho tvaru. Pryznačeńni tłumačacca žadańniem rasiejskaha prezydenta ŭzmacnić urad i svoj upłyŭ na jaho, a «prajekt «Pierajemnik», padajecca, nia bolš jak čutka.

Usie rasiejskija hazety supravadžajuć svaje materyjały apytańniami šmatlikich ekspertaŭ dy razhornutymi bijahrafijami novych pryznačencaŭ, što całkam lahična — bolšaść rasijan ničoha ci amal ničoha nia viedajuć pra ludziej, adnamu ź jakich, vyhladaje, voś-voś adpišuć kiraŭnictva Kramlom dy ŭsioj krainaj.

• 0
• 0
• 0
• 0
• 0
• 0
• 0
• 0