Złaja Viadźmarka Pustki pieratvaryła 18-hadovuju Safi ŭ staruju, pryraŭnavaŭšy hierainiu da čaraŭnika Chaŭła. Staraja Safi najmajecca ŭ pałac Chaŭła prybiralščycaj i damaŭlajecca z chatnim ahieńčykam Kalcyferam ab dapamozie.
U japonskaj animacyi jość žanr fantastyčnych filmaŭ, dzie dziejańnie adbyvajecca ŭ XIX st. i retramašyny susiedničajuć z čaradziejstvam. Fentezi brytanki Dajany Džoŭnz źjaviłasia syravinaj dla japonskaha šedeŭru Chajaa Mijadzaki z kaktejlem mahii j technalohii, dzie samaloty viktaryjanskaj epochi lotajuć z pryvidami.
Ale samaje niezvyčajnaje i dzivosnaje — mechaničny Zamak, ź iržavymi kominami, stalovym jazykom i na kurynych łapkach. U adroźnieńnie ad chaty baby-jahi, Pałac nie saromiejecca techniki, lubić pavandravać dy z ulikam pamieraŭ maje nia dźvie, a čatyry łapy.
Mijadzaki stvaryŭ nia prosta čaraŭničuju prypavieść. Film — paetyčnaja antyvajennaja kazka. U krainie mahii j retramody idzie vajna, strašnaja j biessensoŭnaja, dzie čaraŭniki mabilizavanyja na vajskovuju słužbu. Ale zło tut nie pieramahaje. Navat złaja viedźma stanie biasškodnaj babulkaj z paciešnymi zvyčkami.
Film — psychalahičnaja dakładnaść, niejmaviernaja pramaloŭka detalaŭ, ašałamlalnaja fantazija — i ciapło dabryni.
Karcina, jakuju ni ŭ jakim razie nia varta prapuskać.
❏
«Chadziačy zamak» («Hauru no ugoku shiro»)
Japonija, 2004, kalarovy, 119 chv.
Žanr: anime, kazačna-paetyčnyja pryhody pavodle ramanu D.Džoŭnz.
Adznaka: 9 (z 10).
Ciapier čytajuć
Chto toj nieadekvatny biełarus, jaki lasnuŭ dziciatka hałavoj ab padłohu ŭ maskoŭskim Šaramiećcievie5
Kamientary