Horadnia praciahvaje zmahacca

«Chto ciapier maje ŭładu? Byłyja staršyni rajvykankamaŭ z mahiloŭskaj hłybinki. Što jany bačyli? Voś i dumajuć, što plitka — heta pakazčyk kultury, a asfalt — cyvilizacyja».

Nadrukavany ŭ «NN» artykuł V.Rusielika «Horadnia padaje SOS» (№39, 21 kastryčnika) prabiŭ dzirku ŭ maŭčańni vakoł «rekanstrukcyi» histaryčnaha centru samaha pryhožaha horadu Biełarusi. Piša Janka Lalevič z Horadni.

Pieradrukavany na niekalkich haradzienskich sajtach, artykuł vyklikaŭ prychilnuju reakcyju mieścičaŭ.

Pracytujem niekalki vykazvańniaŭ: «Chto ciapier maje ŭładu? Byłyja staršyni rajvykankamaŭ z mahiloŭskaj hłybinki. Što jany bačyli? Voś i dumajuć, što plitka — heta pakazčyk kultury, a asfalt — cyvilizacyja? Luby eŭrapiejski horad hanarycca tym, što ŭ jaho jość brukavanyja vulicy, navat vyklikajuć brukaroŭ-specyjalistaŭ za durnyja hrošy, kab kłali bruk».

«Valera Rusielik maje racyju. Čaho jany raźbirajuć vulicy, jakija prastajać jašče 100 hod? Lepš zrabili b toje, što patrabuje ramontu. Da taho ž płacim za heta my, padatkapłatniki. Preč brudnyja ruki ad čystaj i śvietłaj minuŭščyny Horadni».

Zastajecca paškadavać, što infarmacyjny vakuŭm (najpierš praz adsutnaść niezaležnaj presy) nie dazvalaje zrabić hetuju infarmacyju bolš dastupnaj žycharam horadu i arhanizavać sapraŭdy šyrokuju dyskusiju ab tym, jak maje vyhladać naš horad.

U kastryčniku niekalki maładych haradziencaŭ, vyjšaŭšy na vulicy horadu, za try dni sabrali trysta podpisaŭ pad zaklikam da ŭładaŭ pierahledzieć plany pa «rekanstrukcyi» horadu. List, u jakim śćviardžałasia nieabchodnaść spynić razbureńnie tradycyjnaj planiroŭki Savieckaj płoščy, byŭ nakiravany ŭ harsaviet i meru horadu. Dać aficyjny adkaz ułady admovilisia, zamiest hetaha u hazecie «Viečiernij Hrodno» nadrukavali interviju z architektaram horadu, jakoje vyhladała, chutčej, na adpisku. U interviju havaryłasia, što plany pa stvareńni piešachodnaj zony ŭ centry horadu realizavać pakul niemahčyma praz adsutnaść srodkaŭ — heta perspektyva nastupnych dziesiaci hadoŭ, ale pakul najbolš važnaje toje, što ŭ pracesie rekanstrukcyi płoščy nie paciarpieli padmurki histaryčnych budynkaŭ, jakija možna budzie niekali restaŭravać.

Ale «rekanstrukcyja» jašče nie zaviaršyłasia, padziemny pierachod pad byłoj Miaščanskaj pabudavany napałovu. Vychad ź pierachodu na druhim baku vulicy, jaki pačnuć budavać tolki ŭ nastupnym hodzie, pavinien trapić akurat na adzin ź flihielaŭ znakamitaha pałacu Radziviłaŭ. Jak by nie pryjšłosia spadaru hałoŭnamu architektaru chutka admovicca ad svaich słoŭ. Jak vyjduć ułady z hetaha stanovišča, pakaža čas, a my abaviazkova prainfarmujem ab hetym hramadztva.

Razbureńnie histaryčnych budynkaŭ u centry praciahvajecca.

• 0
• 0
• 0
• 0
• 0
• 0
• 0
• 0