Taksisty syhnalać, prajaždžajučy kala hłuchoha biełaha muru haradzienskaj turmy, — takim čynam jany padtrymlivajuć svajho kalehu Mikałaja Aŭtuchoviča, jaki čatyry tydni haładaje na narach SIZA.
14 kastryčnika na vaŭkavyskaha pradprymalnika, uładalnika najbujniejšaha ŭ rehijonie pryvatnaha pradpryjemstva ŭ sfery taksi i hruzapieravozak zaviali kryminalnuju spravu pa ŭchileńni ad vypłaty padatkaŭ. U toj samy dzień M.Aŭtuchovič byŭ aryštavany i za kratami abviaściŭ haładoŭku pratestu.
Na minułym tydni sud admoviŭsia zamianić mieru strymańnia na padpisku ab niavyjeździe. Choć, pavodle advakataŭ, stan zdaroŭja pradprymalnika vielmi ciažki. Jahonaja advakatka Nadzieja Stankievič kaža, što za try z pałovaj tydni administracyja SIZA nia vykazała nijakaj cikavaści da pratestu viaźnia — Aŭtuchoviča nivodnaha razu nie naviedali lekary.
Užo dva hady pradprymalnik sprabuje adbicca ad pretenzij Ministerstva pa padatkach i zborach (MPZ) na sumu ŭ miljon dalaraŭ. Za hety čas było šmat sytuacyj, kali inšy b užo pierastaŭ zmahacca, zharnuŭ biznes, źjechaŭ za miažu. Aŭtuchovič pajšoŭ pa ŭsich instancyjach, trymaŭ haładoŭki, pisaŭ zvaroty i adkrytyja listy da prezydenta.
Punktam, u jakim razychodziacca pradprymalnik i padatkaviki, źjaŭlajecca traktoŭka sumnaviadomaha prezydenckaha dekretu №4, jakim kolkaść rabotnikaŭ u pryvatnych pradprymalnikaŭ była abmiežavanaja da 3 čałaviek. U traŭni 2003 h., kali dekret pačaŭ dziejničać, Mikałaj Aŭtuchovič zvolniŭ z pracy kala 60 čałaviek, kiroŭcaŭ, dyspetčaraŭ taksi — i ŭładkavaŭ ich na firmu «Nika-Trans», uładalnicaj jakoj źjaŭlajecca jahonaja žonka. A paśla zaklučyŭ ź firmaj aŭtsortynhavuju damovu — za peŭnuju płatu firma prapanoŭvała pradprymalniku pracu ŭžo svaich kiroŭcaŭ. Takija damovy šyroka vykarystoŭvajucca ŭ śviecie i navat u Biełarusi, asabliva ŭ roźničnym handli: kali ŭładalnik handlovaj kropki maje prablemu z pradaŭcami, jon moža takim čynam «uziać naprakat» pradaŭca, naprykład, z susiedniaj kramy.
Ministerstva paličyła, što M.Aŭtuchovič i firma «Nika-Trans» prydumali schiemu ŭchileńnia ad padatkaŭ, i naličyli sankcyj na sumu bolš jak 700 młn rubloŭ. Za dva hady sudy stanavilisia to na bok pradprymalnika, to na bok MPZ — až pakul urešcie za miesiac da aryštu M.Aŭtuchoviča Vyšejšy haspadarčy sud nie pryniaŭ rašeńnie ab admienie ŭsich sankcyj i pierahladzie spravy.
Adnačasova ŭpraŭleńnie departamentu finansavych raśśledavańniaŭ (UDFR) pa tych samych abstavinach raspačała kryminalnuju spravu ŭ dačynieńni da firmy «Nika-Trans» — tut užo fihuravała suma ŭ 1,3 miljona rubloŭ. Padazronymi prachodzili žonka Aŭtuchoviča i dyrektar firmy Jury Lavonaŭ.
U dzień aryštu 14 kastryčnika Mikałaj Aŭtuchovič razam ź Ju.Lavonavym pryjechaŭ va UDFR aznajomicca z vynikami ekanamičnaj ekspertyzy pa kryminalnaj spravie. Jaho nie vyklikali, jon pryjechaŭ, chutčej, «za kampaniju».
Ekspertyza akazałasia na karyść firmy i pradprymalnika. Sami specyjalisty MPZ zaśviedčyli śledztvu, što schiema, pa jakoj «Nika-Trans» supracoŭničała z Aŭtuchovičam, zakonnaja. Śledčy Alichvier abviaściŭ, što ź «Nika-Trans» zdymajucca ŭsie pretenzii — i praz chvilinu zavioŭ spravu suprać Mikałaja Aŭtuchoviča.
Sam aryšt i toje, jak praviali jaho śledčyja UDFR, advakat Nadzieja Stankievič nazyvaje «biaźmiežžam». Kala 15-j hadziny Aŭtuchoviču abviaščajuć pra zaviadzieńnie spravy. Praz 20 chvilin pradprymalniku dajuć padpisać pastanovu ab pryciahnieńni jaho da adkaznaści ŭ jakaści padazravanaha. Aŭtuchovič patrabuje advakata. Praz hadzinu śledčy pravodzić ź im pieršy dopyt jak z padazravanym. Pavodle słoŭ N.Stankievič, śledčy sam byŭ niepadrychtavany da dopytu: jon zadaŭ tolki dva niaznačnyja pytańni. U 18.25 Aŭtuchoviču dajuć padpisać pastanovu ab pryciahnieńni jaho da adkaznaści ŭ jakaści abvinavačvanaha. Jaho znoŭ chočuć dapytać, ale jon užo admaŭlajecca davać pakazańni. Kala 18.45 śledčy daje jamu padpisanuju prakuroram pastanovu ab aryšcie. Kali navat nia ŭličvać, što 14 kastryčnika — heta piatnica, skaročany dzień, dyk usio roŭna vychodzić, što prakuror vyvučaŭ spravu i davaŭ sankcyju na aryšt užo ŭ niepracoŭny čas. Padobnaje, padkreślivaje Stankievič, byvaje tolki ŭ vyklučnych vypadkach.
Śledčyja nie cikaviacca Aŭtuchovičam. Tolki adzin raz, 19 kastryčnika, śledčy UDFR Alichvier pryjšoŭ u SIZA, kab dapytać pradprymalnika. Ale stan zdaroŭja Aŭtuchoviča ŭžo tady, praź piać dzion paśla aryštu, byŭ ciažki, i śledčy napisaŭ u pratakole: «Pravieści dopyt niemahčyma».
Na dumku Nadziei Stankievič heta dadatkovy dokaz taho, što adzinaj metaj zaviadzieńnia kryminalnaj spravy było žadańnie mienavita «zakryć» jaho, izalavać.
Kamientary