Kraŭcoŭ prymusiŭ Kučynskaha apraŭdvacca za niedaskanałuju sankcyjnuju palityku Jeŭrasajuza

Abmiarkoŭvajučy ŭ novym vypusku jutub-prajekta «Mnie taksama nie padabajecca» sankcyjnuju palityku Jeŭrasajuza suprać Biełarusi, sakratar Kaardynacyjnaj rady i były siabar štaba Viktara Babaryki Ivan Kraŭcoŭ zaŭvažyŭ:

«Ja tam pytaŭsia ŭžo ŭ Jeŭrakamisii. Słuchajcie, Uźbiekistan, Kazachstan, Kyrhyzstan, Turcyja — člen NATA, Kitaj — vializnaja dzirka pamieram ź viadro. Usie hetyja krainy zaraz dapamahajuć Rasii abychodzić sankcyjny režym Zachadu. Vielizarnaja kolkaść, miljardy dalaraŭ valać prosta. Ale čamuści ja nie čuŭ, kab uviali sankcyi suprać Turcyi».

Zhadaŭšy raspaŭsiudžanaje mierkavańnie ab tym, što «režym Łukašenki padtrymlivaje vajnu va Ukrainie», Kraŭcoŭ zaŭvažyŭ: «Drony nie laciać z terytoryi Biełarusi ŭžo daŭno. Nu voś hety epizod pieršy, jon žudasny, viadoma.

Ja dumaju, što Łukašenka sam byŭ absalutna nieščaślivy, što tak zdaryłasia. Miarkujučy pa tym, jak jon reahavaŭ, nijakaj pryhažości i radaści ŭ hetym dla siabie jon nie ŭbačyŭ. A toje, što jon zaraz sprabuje maksimalna dystancyjavacca ŭ ramkach mahčymaha, mnie padajecca, heta vidavočna».

Pa słovach Kraŭcova, padtrymka «maleńkaj Biełaruśsiu» Rasii ŭ vajnie z Ukrainaj nieparaŭnalna z takimi krainami, jak Kitaj i Turcyja.

«My prydumali chłopčyka dla źbićcia i raskazvajem historyi, što «davajcie my praz sankcyi na Biełaruś razburym rasijskuju vajennuju mašynu». Troški takaja papulisckaja palemika, jak pa mnie», — vykazaŭ krytyku sakratar Kaardynacyjnaj rady.

Na hetuju zaŭvahu dypłamatyčny daradca Cichanoŭskaj Dzianis Kučynski adkazaŭ, što nie ličyć pazicyju Ofisa adnosna ŭzmacnieńnia sankcyj papulisckaj. Jon pryznaje, što składana paraŭnoŭvać uniosak Biełarusi z Kitajem i Turcyjaj.

«Ale ŭsio adno heta vielizarnaja [padtrymka Rasii z boku Biełarusi]. 300 pradpryjemstvaŭ, vielizarniejšy ŭzrovień pradukcyi. Abychod sankcyj. Usie hetyja dzirki».

«Ale ź Litvy kožny dzień jeździać hruzaviki z kazachskimi numarami z sankcyjonkaj. Nichto ničoha nie robić. Razumieješ? A my raskazvajem pra toje, jak my zmahajemsia», — zapiarečyŭ Kraŭcoŭ.

«Nie zusim. Heta inšaje. Ja nie dumaju, što heta moža być vielmi cikavym. Ale, kali cikava… Sapraŭdy, jość prablema, taho, što ŭ Jeŭrasajuzie nie było doŭhi čas miechanizma pa implemientacyi sankcyjnaj palityki. Jon źjaviŭsia zusim niadaŭna. Asobny ofis, jaki jakraz vyjaŭlaje dzirki, pracuje nad harmanizacyjaj sankcyj, hladzić, kab usie «stany» — Kyrhyzstan, Kazachstan i inšyja — nie mahli hetaha rabić», — patłumačyŭ Kučynski.

Na jaho pohlad, nielha kazać, što «prosta zapluščvajucca na heta vočy i nichto z hetym ničoha nie robić». Treba razumieć, davodziŭ dypłamatyčny daradca Cichanoŭskaj, što

«my majem spravu sapraŭdy z takim składanym, vopytnym, hanhstarskim režymam, jaki viedaje, jak heta rabić na praciahu niekalkich dziesiacihodździaŭ. Tamu zrazumieła, što jany vielmi razumnyja ŭ peŭnym sensie, kab znachodzić hetyja abychody. Ale heta nie značyć, što ničoha nie robicca, kab hetaha nie adbyvałasia».

U dalejšaj razmovie Kučynski zaŭvažyŭ, što Jeŭrasajuz pravodzić kompleksnuju palityku adnosna Biełarusi, jakaja nakiravana na spynieńnie ŭ Biełarusi represij i vyzvaleńnie palitviaźniaŭ.

Na heta Kraŭcoŭ zaŭvažyŭ:

«Jość vialikaja roźnica pamiž patrabavańniem pa źmienie režymu i patrabavańniem ab vyzvaleńni palitviaźniaŭ. Usio ž hetuju roźnicu treba taksama fiksavać».

«Absalutna zhodny. Tut jość absalutnaja zhoda, što jość asnoŭnyja pieršyja kryteryi: vypusk palitźniavolenych, spynieńnie represij. Pačynajem z hetaha», — pahadziŭsia Kučynski.

• 7
• 0
• 0
• 1
• 0
• 0
• 0
• 0