Банкір Віктар Бабарыка абвясціў пра сваё жаданне ўдзельнічаць у прэзідэнцкіх выбарах 2020 года. «НН» сабрала факты пра ягоную сям’ю.
Жонка загінула на Мадэйры
У шлюбе з жонкай Марынай банкір пражыў амаль 30 гадоў. Трагедыя здарылася ў жніўні 2017 года на партугальскім востраве Мадэйра. Жанчына займалася дайвінгам і падплыла занадта блізка да адной з лодак, што прывяло да смерці.
Дайвінг — даўняе захапленне сям’і Бабарыкаў. Банкір пачаў займацца дайвінгам у 1999 годзе, на яго рахунку больш за 700 пагружэнняў. Пасля захапілася і яго жонка Марына.
Сам Бабарыка казаў, што яны з жонкай былі «жахліва розныя людзі», але зрабілі вялікую працу, каб сям’я адбылася.
«Яна змяніла мяне ў корані. Яна адвучыла мяне ад эгаізму. Яна зрабіла маё жыццё, — казаў Віктар. — Я не ўяўляю сабе, да чаго б мяне прывяло маё жыццё, калі б я быў адзін і будаваў яго на іншых прынцыпах, толькі для сябе. Гэты комплекс закладзены ў нас як адзінае цэлае: мы павінны быць у сям'і, мы павінны выхоўваць новых людзей і мы павінны змяняць гэты свет».
Марына Бабарыка займалася дабрачыннай і мецэнацкай дзейнасцю, яна ўзначальвала апякунскую раду фонду «Шанс».
Сын стварыў дабрачынныя платформы
Эдуард Бабарыка — сын банкіра, дастаткова вядомая асоба сярод мінскай публікі. 30-гадовы бізнэсмен стаў заснавальнікам краўдфандынгавай пляцоўкі «Улей», а пасля і праекта Molamola.
Эдуард таксама быў аўтарам некалькіх стартап-праектаў. Напрыклад, ідэі для планавання групавых падарожжаў elHobo.
Менавіта Эдуард стаў кіраўніком ініцыятыўнай групы бацькі.
Дачка жыве ў Аўстраліі
Дачка Марыя таксама пайшла па банкаўскай лініі, працавала ў Лондане ў банкаўскай кампаніі J. P. Morgan Home. «Як загнаная, яна спала па 3-6 гадзін на суткі, не мела выхадных. Я быў у шоку, але яна сказала: «Ты ж мяне вучыў», — казаў Бабарыка ў «Току».
«У выніку яна плюнула на Лондан, плюнула на J. P. Morgan і пераехала жыць у Аўстралію, працуе там, шчаслівы чалавек. І я выдыхнуў», — казаў банкір. Цяпер ён бачыць дачку два разы на год: на Новы год (прыязджае яна) і цягам года (ці Бабарыка прыязджае ў Аўстралію, ці на нейтральнай тэрыторыі).
Глядзі таксама: «Ток» з Віктарам Бабарыкам
-
Як Радзім Гарэцкі прамяняў кар'еру ў Маскве на Мінск і не пашкадаваў. Гісторыя жыцця 96-гадовага віцэ-прэзідэнта Акадэміі навук
-
Пазняк: Выпускаюць толькі прарасійскіх людзей, а не беларускіх патрыётаў
-
Лідар на Пірэнеях. З'явіўся «народны» рэйтынг устаноў, праз якія яшчэ можна атрымаць шэнгенскую візу
Каментары