Žonka zahinuła, dačka ŭ Aŭstralii. Što viadoma pra siamju Viktara Babaryki
Bankir Viktar Babaryka abviaściŭ pra svajo žadańnie ŭdzielničać u prezidenckich vybarach 2020 hoda. «NN» sabrała fakty pra jahonuju siamju.
Žonka zahinuła na Madejry
U šlubie z žonkaj Marynaj bankir pražyŭ amal 30 hadoŭ. Trahiedyja zdaryłasia ŭ žniŭni 2017 hoda na partuhalskim vostravie Madejra. Žančyna zajmałasia dajvinham i padpłyła zanadta blizka da adnoj z łodak, što pryviało da śmierci.
Dajvinh — daŭniaje zachapleńnie siamji Babarykaŭ. Bankir pačaŭ zajmacca dajvinham u 1999 hodzie, na jaho rachunku bolš za 700 pahružeńniaŭ. Paśla zachapiłasia i jaho žonka Maryna.
Sam Babaryka kazaŭ, što jany z žonkaj byli «žachliva roznyja ludzi», ale zrabili vialikuju pracu, kab siamja adbyłasia.
«Jana źmianiła mianie ŭ korani. Jana advučyła mianie ad ehaizmu. Jana zrabiła majo žyćcio, — kazaŭ Viktar. — Ja nie ŭjaŭlaju sabie, da čaho b mianie pryviało majo žyćcio, kali b ja byŭ adzin i budavaŭ jaho na inšych pryncypach, tolki dla siabie. Hety kompleks zakładzieny ŭ nas jak adzinaje cełaje: my pavinny być u siamji, my pavinny vychoŭvać novych ludziej i my pavinny źmianiać hety śviet».
Maryna Babaryka zajmałasia dabračynnaj i miecenackaj dziejnaściu, jana ŭznačalvała apiakunskuju radu fondu «Šans».
Syn stvaryŭ dabračynnyja płatformy
Eduard Babaryka — syn bankira, dastatkova viadomaja asoba siarod minskaj publiki. 30-hadovy biznesmien staŭ zasnavalnikam kraŭdfandynhavaj placoŭki «Ulej», a paśla i prajekta Molamola.
Eduard taksama byŭ aŭtaram niekalkich startap-prajektaŭ. Naprykład, idei dla płanavańnia hrupavych padarožžaŭ elHobo.
Mienavita Eduard staŭ kiraŭnikom inicyjatyŭnaj hrupy baćki.
Dačka žyvie ŭ Aŭstralii
Dačka Maryja taksama pajšła pa bankaŭskaj linii, pracavała ŭ Łondanie ŭ bankaŭskaj kampanii J. P. Morgan Home. «Jak zahnanaja, jana spała pa 3-6 hadzin na sutki, nie mieła vychadnych. Ja byŭ u šoku, ale jana skazała: «Ty ž mianie vučyŭ», — kazaŭ Babaryka ŭ «Toku».
«U vyniku jana plunuła na Łondan, plunuła na J. P. Morgan i pierajechała žyć u Aŭstraliju, pracuje tam, ščaślivy čałaviek. I ja vydychnuŭ», — kazaŭ bankir. Ciapier jon bačyć dačku dva razy na hod: na Novy hod (pryjazdžaje jana) i ciaham hoda (ci Babaryka pryjazdžaje ŭ Aŭstraliju, ci na niejtralnaj terytoryi).
Hladzi taksama: «Tok» ź Viktaram Babarykam
Ciapier čytajuć
«Usio tak ci inakš budzie vyrašacca na poli boju». Čym budzie zajmacca novaja kiraŭnica Misii demakratyčnaj Biełarusi va Ukrainie?12
Kamientary