Цапкала: Чаму за пяць гадоў ніводзін з так званых офісаў і кабінетаў не дамогся вызвалення ніводнага палітвязня?

Вызваленне Сяргея Ціханоўскага і яшчэ 13 палітвязняў — значнае дасягненне Дональда Трампа і амерыканскай дыпламатыі, адзначыў Цапкала.

Ён разважае, чаму Лукашэнка рашыў выпусціць Сяргея Ціханоўскага.

«Заклікі да сумлення, гуманнасці, велікадушнасці, да правоў дзіцяці — для яго пусты гук. Ён баіцца толькі аднаго: высокадакладных ракет і беспілотнікаў. Ён баіцца застацца без канала сувязі з Захадам (…).

У гэтым свеце ён шануе толькі дзве рэчы: асабістую бяспеку і ўтрыманне ўлады. Усё астатняе — размовы для бедных. Страціць канал сувязі з Захадам — значыць назаўжды замкнуцца ў бункеры і страціць магчымасць пазіраваць у полі з мяшком бульбы або ладзіць паказальныя разносы ў кароўніках.

Менавіта страх за ўласнае жыццё стаў сапраўднай прычынай саступкі спецпасланніку прэзідэнта ЗША. Лукашэнка, як і ўсе дыктатары, разумее толькі мову сілы». 

Цапкала дадаў, што напярэдадні Дня незалежнасці Беларусі спадзяецца на вызваленне і іншых вязняў сумлення. «Прэзідэнт Трамп здольны дамагчыся гэтага літаральна двума пстрычкамі пальцаў».

«Але пры гэтым застанецца без адказу галоўнае пытанне: чаму за ўсе гэтыя пяць гадоў ні адзін з так званых «офісаў», «кабінетаў» і іншых псеўда-структур, якія атрымалі сотні мільёнаў еўра ад заходніх донараў і праводзілі тысячы сустрэч на вышэйшым узроўні — уключаючы сустрэчы з прэзідэнтам Байдэнам — так і не дамогся вызвалення ніводнага палітычнага зняволенага?»

«Цяпер яны імкліва прыпісваюць сабе гэта дасягненне, — піша Цапкала. — Але няўжо хтосьці сур'ёзна верыць, што іх «барацьба», якая зводзілася да заклікаў адпраўляць паштоўкі ў турмы — паштоўкі, якія нават не даходзілі да адрасатаў, — прывяла хоць да якога-небудзь выніку, акрамя асабістага ўзбагачэння саміх «барцуноў»? Няўжо нехта лічыць, што гэтыя паштоўкі так расчулілі турэмных наглядчыкаў, што тыя, абціраючы скупую слязу, адважыліся на калектыўны зварот да Лукашэнкі з просьбай вызваліць зняволеных? (…)

Як павядзе сябе Сяргей Ціханоўскі ў новых абставінах — пакажа час. Альбо ён застанецца бескампрамісным змагаром за прынцыпы і пастараецца ачысціць аўгіевы стайні ад бруду карупцыі і крадзяжу, у якіх загразла асяроддзе яго жонкі. Альбо ён паддасца салодкім спевам дасведчаных грантасосаў, якія за дзесяцігоддзі навучыліся ператвараць барацьбу і пакуты іншых у асабістыя даходы для сябе, і вырашыць, што фінансава больш выгадна супакоіць сумленне, змірыцца з роляй «шасцёркі» і атрымліваць ад іх падачкі — пры ўмове, што будзе добра сябе паводзіць.

Але гэта — заўтра. А сёння мы шчыра радуемся за Сяргея і ўсіх, хто разам з ім здабыў свабоду. Няхай іх фізічнае і душэўнае аднаўленне будзе поўным і хуткім».

• 20
• 14
• 0
• 20
• 0
• 1
• 3
• 0