У 2,6 раза скарацілі спіс прамысловых тавараў, забароненых да вывазу з Беларусі
У Беларусі істотна скарацілі пералік прамысловых тавараў, вываз якіх за межы краіны забаронены. Адпаведныя змены прадугледжаныя пастановай Савета Міністраў ад 1 верасня 2026 года №442, апублікаванай на Нацыянальным прававым партале.
Сам тэрмін дзеяння забароны працягнуць да 22 сакавіка 2027 года, але пры гэтым спіс тавараў значна скароцяць — са 199 да 77 пазіцый, субпазіцый і падсубпазіцый ТН ЗЭД ЕАЭС.
Новыя правілы пачнуць дзейнічаць 23 верасня 2026 года.
З пераліку выключылі, у прыватнасці, халадзільнікі і маразільнікі, цеплавыя помпы, дызельныя і паўдызельныя рухавікі, абсталяванне для вытворчасці віна і сокаў, вадкасныя помпы і пад'ёмнікі, буйныя ёмістасці для сціснутага або звадкаванага газу.
Таксама забарона больш не будзе распаўсюджвацца на некаторыя віды гіпсу і ангідрыту, асобныя медыцынскія цэменты і матэрыялы, грузапад'ёмныя краны, а таксама пэўныя віды адкідаў і лому каразійнаўстойлівай сталі.
Акрамя поўнага выключэння асобных тавараў, у многіх групах пералік таксама звузілі. Цяпер абмежаванне будзе дзейнічаць не для ўсёй таварнай пазіцыі, субпазіцыі або падсубпазіцыі, а толькі для яе часткі.
Забарона на вываз асобных прамысловых тавараў дзейнічае ў Беларусі з сакавіка 2022 года і раней неаднаразова працягвалася. Цяперашні тэрмін яе дзеяння заканчваецца 22 верасня, пасля чаго пачне дзейнічаць абноўлены пералік.
Цяпер чытаюць
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску21
Каментары