У школах увядуць абноўленую праграму па інфарматыцы з акцэнтам на ШІ
З 1 верасня ў вучняў VI—IX класаў беларускіх школ пачне дзейнічаць абноўленая вучэбная праграма па інфарматыцы. Адпаведныя змены прадугледжаныя пастановай Міністэрства адукацыі № 32 ад 22 ліпеня 2026 года.
Галоўным новаўвядзеннем стане інтэграцыя тэхналогій штучнага інтэлекту ў навучальны працэс. Вучні будуць не толькі знаёміцца з магчымасцямі сучасных ШІ-сэрвісаў, але і вучыцца правільна і бяспечна іх выкарыстоўваць.
Праграма разлічаная на 139 акадэмічных гадзін — па адной гадзіне на тыдзень у кожным з чатырох класаў. Яна ахоплівае шэсць асноўных напрамкаў, у тым ліку алгарытмізацыю, праграмаванне, камп'ютарнае мадэляванне і працу з інфармацыйнымі тэхналогіямі.
Асноўны акцэнт будзе зроблены на практычных навыках. Школьнікі будуць прымяняць лічбавыя веды пры вырашэнні задач па матэматыцы, фізіцы, біялогіі і геаграфіі, што павінна спрыяць развіццю функцыянальнай пісьменнасці.
Асобны раздзел прысвечаны выкарыстанню штучнага інтэлекту. Вучні навучацца складаць эфектыўныя запыты да ШІ-сістэм, правяраць дакладнасць атрыманай інфармацыі, працаваць з тэкстамі, аўдыя– і відэаматэрыяламі, а таксама аналізаваць вынікі, якія прапануюць лічбавыя інструменты.
У праграму таксама ўключаныя асновы кібербяспекі. Школьнікі будуць вывучаць правілы абароны персанальных даных, спосабы распазнання інтэрнэт-махлярства і дыпфэйкаў, нормы сеткавага этыкету, адказнае выкарыстанне штучнага інтэлекту і захаванне аўтарскіх правоў.
Акрамя гэтага, вучняў пазнаёмяць з беларускімі адукацыйнымі ІТ-рэсурсамі.
У Міністэрстве адукацыі адзначылі, што пасля засваення новай праграмы школьнікі атрымаюць сучасныя навыкі аналізу інфармацыі, працы з воблачнымі сэрвісамі, стварэння мультымедыйнага кантэнту, а таксама будуць развіваць алгарытмічнае мысленне, неабходнае для далейшага навучання і прафесійнай дзейнасці.
Латвія «па тэхнічных прычынах» закрыла мяжу з Беларуссю12
Каментары