Зяленскі: Пуцін не гатовы спыніць гэтую вайну — ён рыхтуецца да мабілізацыі
«Ён хоча зрабіць гэта пасля выбараў у Дзярждуму 21 верасня», — сказаў прэзідэнт Украіны.
«Пуцін не гатовы спыніць гэтую вайну — ён рыхтуецца да мабілізацыі». Пра гэта прэзідэнт Украіны Уладзімір Зяленскі заявіў у інтэрв’ю Sky News.
«Ёсць даныя разведкі, што ён [прэзідэнт Уладзімір Пуцін] рыхтуецца да мабілізацыі. Ён хоча зрабіць гэта пасля выбараў у Дзярждуму 21 верасня. Ён хоча ўзмацніць мабілізацыю. Не адкрыта, бо баіцца свайго грамадства, але ён зробіць гэта ў пачатку кастрычніка, калі мы не створым яму праблемы з лагістыкай, зброяй, бензінам, дызелем і калі нашы партнёры не ўвядуць поўныя санкцыі за яго агрэсію», — адзначыў ён.
Зяленскі лічыць, што гэта стане «вялікай праблемай», бо Пуцін разлічвае мабілізаваць «ад 300 да 500 тысяч чалавек».
«Для яго мабілізаваць такую колькасць людзей не так ужо складана. У яго будуць унутраныя праблемы з гэтым, бо яго грамадства — і я бачыў апытанне — выступае супраць мабілізацыі. Значны працэнт насельніцтва таксама выступае супраць вайны, але яны ўсё роўна падтрымліваюць Пуціна. Ён не зможа хутка падрыхтаваць гэтых людзей. А гэта зноў азначае, што ён будзе адпраўляць на поле бою дрэнна падрыхтаваных людзей. А гэта азначае вялікія страты», — заявіў прэзідэнт Украіны.
Каментары