Студэнты пабудавалі першую ў свеце машыну хуткай дапамогі на сонечнай энергіі
Новы аўтамабіль прызначаны для аддаленых рэгіёнаў, дзе доступ да медыцынскай дапамогі ўскладняюць адсутнасць электрычнасці і паліва. Па сутнасці, гэта міні-клініка на колах.
Як паведамляе сайт Тэхнічнага ўніверсітэта Эйндховена (Нідэрланды), праект пад назвай Stella Juva распрацавала каманда Solar Team Eindhoven. Яна аб'ядноўвае 23 студэнтаў трох нідэрландскіх навучальных устаноў. Дзеля працы над праектам яны прыпынілі вучобу на год.
У адрозненне ад традыцыйнай машыны хуткай дапамогі Stella Juva прызначана не толькі для таго, каб дастаўляць пацыентаў у бальніцу. Сярод яе задач — прывезці медыцынскую дапамогу туды, дзе атрымаць яе складана. На борце можна праводзіць аналізы крыві, абследаванні на сухоты і малярыю, вакцынацыю, ультрагукавыя даследаванні цяжарных.
Ідэя праекта ўзнікла пасля кансультацый з арганізацыяй Amref Health Africa, якая займаецца развіццём аховы здароўя ў краінах Афрыкі. Паводле яе прадстаўнікоў, у многіх аддаленых рэгіёнах медыцынскім работнікам даводзіцца пераадольваць вялікія адлегласці на веласіпедах, а нестабільнае электразабеспячэнне не дазваляе захоўваць вакцыны пры патрэбнай тэмпературы або выкарыстоўваць частку дыягнастычнага абсталявання. Менавіта для такіх умоў і распрацоўвалася новая машына.
Энергію Stella Juva атрымлівае ад сонечных панэляў, усталяваных на даху. Яны сілкуюць як электрарухавік, так і медыцынскае абсталяванне. Паводле распрацоўшчыкаў, у сонечнае надвор'е аўтамабіль здольны праехаць да 715 кіламетраў без падзарадкі.
У жніўні Stella Juva адправяць у Кенію, дзе яе выпрабуюць у рэальных умовах. Падчас паездкі плануецца наведаць некалькі аддаленых населеных пунктаў і змадэляваць розныя сцэнарыі аказання медыцынскай дапамогі, у тым ліку пацыентам з сухотамі. Распрацоўшчыкі таксама хочуць праверыць, як аўтамабіль павядзе сябе падчас працяглых паездак, выкарыстоўваючы выключна сонечную энергію.
Пакуль незразумела, ці пойдзе Stella Juva ў масавую вытворчасць. Каманда ў першую чаргу хоча прадэманстраваць патэнцыял гэтай тэхналогіі аўтамабільнай прамысловасці і гуманітарным арганізацыям.
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3232
Каментары