Лукашэнка прызнаў, што Расія ва Украіне не дасягнула мэтаў. Патлумачыў гэта тым, што Пуціна падманулі Ватыкан і яўрэйскае лобі
У інтэрв'ю тэлеканалу «Аль-Арабія» Аляксандр Лукашэнка выклаў сваю арыгінальную версію, чаму развязаная Расіяй у лютым 2022 года пры ягонай падтрымцы вайна ва Украіне не скончылася хуткай перамогай Расіі. УСУ, аказваецца, тут ні пры чым, проста ўмяшаліся іншыя варожыя сілы, піша БелТА.
«Па ходзе баявых дзеянняў [у пачатку вайны] не толькі я, але і ўсе ў свеце разумелі, што вайна скончыцца хутка перамогай расіян. Гэта было звязана перш за ўсё з тым, што расіяне былі ў Кіеве. Але потым пэўныя палітыкі і сілы папрасілі Пуціна спыніцца, адвесці войскі ад Кіева і заключыць мірнае пагадненне.
Бачачы такую сітуацыю і тое, што гіне нямала людзей і што вайна, будзем адкрытыя, ідзе трохі не зусім па сцэнарыі, які быў прапісаны, Пуцін пагадзіўся і вывеў свае перадавыя часткі з Кіева. Да гэтага вываду ўсе разумелі, што дні Украіны былі злічаныя», — расказвае арабскай журналістцы Лукашэнка.
Але злыя сілы толькі падступна скарысталіся з міралюбнасці і Пуціна:
«Чарговы раз, напэўна, — я ведаю — гэтыя сілы падманулі. Гэта быў Ватыкан. І, што дзіўна, яўрэйскае лобі, ізраільцяне. Яны ад імя Зяленскага заяўлялі: усё, ідзём на мір, згаджаемся. Ну і іншыя».
Калі б Пуціна не падманулі і ён працягнуў наступ, то, перакананы Аляксандр Лукашэнка, «там ні Зяленскага, нікога б не засталося». І ён у гэтай думцы не адзінокі, кіраўніцтва беларускага войска таксама з ім у гэтай ацэнцы салідарнае. Аднак выйшла як выйшла:
«Далей вайна зацягнулася. Ужо пяты год ідзе вайна, ніхто мэтаў не дабіўся».
Хоць Расія, на думку Лукашэнкі, і цяпер выглядае больш пераканаўча, так што яе перамога наперадзе.
Каментары