Перапынкі «для гідратацыі» на чэмпіянаце свету раздражняюць не толькі вас
Футбалістам папіць вады, а ФІФА атрымала 10 дадатковых гадзін рэкламнага часу.
Ідэя «паўзы папіць вады» ўпершыню з'явілася на чэмпіянаце свету 2014 года ў Бразіліі. Тады ФІФА дазваляла такія перапынкі толькі падчас матчаў, якія праходзілі ў моцную спёку — пры тэмпературы вышэйшай за 32 градусы Цэльсія.
Аднак, як піша The Wall Street Journal, на цяперашнім чэмпіянаце свету ў ЗША яны сталі абавязковымі незалежна ад надвор'я. Цяпер матчы рэгулярна спыняюцца прыкладна на 22‑й і 67‑й хвілінах. Напрыклад, падчас першага матча зборнай ЗША на турніры ў Лос-Анджэлесе перапынак для гідратацыі быў абвешчаны пры тэмпературы ўсяго каля 21 градуса Цэльсія.
Таму многія ў футбольным свеце мяркуюць, што справа не толькі ў клопаце пра здароўе гульцоў. Кожны матч атрымлівае дзве дадатковыя троххвілінныя паўзы, а ўсяго на турніры будзе згуляна 104 матчы. У выніку арганізатары і вяшчальнікі атрымліваюць больш за дзесяць дадатковых гадзін эфірнага часу для паказу рэкламы.
Паводле ацэнак прадстаўнікоў амерыканскага рэкламнага рынку, 30‑секундны ролік падчас звычайных матчаў можа каштаваць каля 200 тысяч долараў. Калі ж гуляе зборная ЗША, кошт рэкламы вырастае прыкладна да 750 тысяч долараў.
Тэлеканал Fox Sports, які валодае англамоўнымі правамі на трансляцыю турніру ў ЗША, у першы ж перапынак на папіць паказаў пяць рэкламных ролікаў запар. А ў другім тайме матча-адкрыцця рэклама так зацягнулася, што гледачы нават прапусцілі некалькі секундаў гульні.
Віцэ-прэзідэнт Fox Sports Зак Кенуорці (Zac Kenworthy) адзначаў яшчэ да старту турніру, што ФІФА пастаянна шукае новыя спосабы развіцця спаборніцтваў і з вялікай цікавасцю вывучае амерыканскі вопыт арганізацыі спартыўных трансляцый.
Такі падыход выклікаў скепсіс у многіх прадстаўнікоў футбольнага свету. Галоўны трэнер зборнай Францыі Дыд'е Дэшам (Didier Deschamps) адзначыў, што троххвілінныя паўзы перарываюць ход гульні, збіваюць рытм і прымушаюць усіх прыстасоўвацца. «Але вяшчальнікі, напэўна, задаволеныя», — заўважыў ён яшчэ перад пачаткам турніру.
Найбольш эмацыйна на новаўвядзенне адрэагавалі заўзятары. Сацыяльныя сеткі запоўніліся скаргамі на тое, што «прыгожую гульню» цяпер ставяць на паўзу, каб карпарацыі маглі ўсунуць свае тавары. Тым не менш, яны не надта здзіўленыя тым, што рэкламныя паўзы ўрэшце прабраліся ў гульню.
Як адзначае WSJ, колькі існуе футбол, заўсёды была адна праблема з яго адаптацыяй пад амерыканскую мадэль спартыўнага тэлевяшчання. Амерыканскі футбол, баскетбол і бейсбол літаральна прасякнутыя тайм-аўтамі, перыпынкамі, канцамі інінгаў і зменамі валодання мячом.
А вось традыцыйны футбол, наадварот, заўсёды ішоў бесперапынна: два таймы па 45 хвілін без аніякіх паўзаў. Цяпер жа «перапынкамі для гідратацыі» арганізатары фактычна падзялілі футбольны матч на чатыры чвэрці.
А вы што думаеце пра такія навацыі?
Нічыя Нідэрландаў, перамога Кот д'Івуара і буйная перамога Швецыі
«Іх Валерый Лявонцьеў трэніруе?» Сацсеткі рагочуць і захапляюцца леапардавымі касцюмамі футбалістаў зборнай Конга
Марока згуляла ўнічыю з Бразіліяй, Шатландыя выйграла ў Гаіці
Італьянцаў абурыў каментар прэзідэнта ФІФА адносна непрысутнасці іх футбольнай зборнай на чэмпіянаце свету
Беларуска год адпрацавала дальнабойшчыцай у Еўропе. Цяпер спрабуе паступіць у італьянскі ўніверсітэт6
Каментары