«Там трындзец!» Як амапаўцы не хацелі, каб іх камандзірам была пераможца міліцэйскага конкурсу прыгажосці — зліў размоў

«Кіберпартызаны» апублікавалі два запісы тэлефонных размоў камандзіра ўзвода АМАПа Аксаны Краўчанка — з камандзірам аддзялення Алегам Барадаўкам і калегай Ганнай Ляцко. У размовах Краўчанка дзеліцца ўражаннямі ад рэакцыі саслужбоўцаў на новае прызначэнне Шахавай. Гэтыя званкі адбываліся некалькі гадоў таму. 

«Там такая вайна цяпер. Я проста, бл**ь, у шоку. Там наогул трындзец! (…) Я нешта сёння наогул не зразумела… З такімі, я табе кажу, папрокамі, з такімі псіхамі сёння было — гэта наогул!» — скардзіцца Краўчанка Барадаўку.

Такая рэакцыя калектыву, па словах Краўчанкі, была для яе вялікай нечаканасцю. Яна даводзіць суразмоўцу, што «ніколі не бачыла з іх боку да Шахавай нейкай непрыязнасці».

Паводле слоў Аксаны, падначаленыя адкрыта выступілі супраць новай начальніцы, заяўляючы, што камандаванне наплявала на меркаванне «стараслужачых». Пры гэтым сама Шахава адносіцца да «сярэдніх» па стажы:

«Яна атрымліваецца такая сярэдняя як бы, яна адслужыла 6 гадоў з 12. Ну, груба кажучы, там некаторыя адслужылі крыху больш, але ў іх там былі два дэкрэты, дэкрэт, гэта значыць, ну, прыбярыце — дык тое самае і выходзіць».

На пытанне Барадаўкі пра тое, хто найбольш выказвае незадаволенасць, Краўчанка называе канкрэтныя прозвішчы і фармулюе асноўную прэтэнзію калектыву:

«Мы хочам, каб у нас быў камандзір аддзялення, які мае ў нас аўтарытэт!»

Камандзір узвода ў адказ на абурэнне падначаленых заявіла: «Камандзіраў прызначаюць, а не выбіраюць нейкім там галасаваннем». У адказ яна пачула:

«Мы станем у апазіцыю, мы не будзем яе слухаць!».

Саслужбоўкі вінавацяць Шахаву ў тым, што яна ігнаруе свае абавязкі:

«Ды яна забівае, ёй по*уй на вашу працу!»

У іншай размове, з Ганнай Ляцко, Краўчанка заўважае: «Вайна сусветаў была тут сёння… Спачатку Ленцы яны выказалі сваё ўсё «фе, фу», потым — мне. І разумееш, з такімі псіхамі, з такімі папрокамі… Я кажу: «Добра, канкрэтна скажыце».

Аказваецца, Шахава такая ху*вая! Яна наогул не працуе, яна наогул працаваць не хоча! Яна на кожным мерапрыемстве фукае, фекае! Ёй наогул гэтая праца не патрэбная…»

— пераказвае яна скаргі калег.

«Я не ведаю, у іх столькі злосці, столькі нянавісці», — дзеліцца ўражаннямі Краўчанка і дадае, што яшчэ пагутарыць на гэтую тэму з самой Шахавай.

У сваю чаргу Ганна Ляцко адзначыла, што Шахава «не ідэальная» і была неаднаразова заўважаная ў хлусні, што яна лічыць вялікім мінусам. Да таго ж яна звярнула ўвагу на «пераменлівы настрой» Ганны і выказала недавер да яе лагодных паводзін падчас прызначэння.

Сама Краўчанка заўважыла, што на гэтай пасадзе яна хацела б бачыць іншага чалавека — Лявоненка, якая яе цалкам задавальняе.

• 0
• 1
• 40
• 8
• 1
• 0
• 0
• 0