Сяброўка па Нясвіжы пра Мельнікаву: Нібы падмянілі жанчыну, я ж ведала зусім іншую Анжаліку
Мастачка, паэтка і грамадская дзеячка з Нясвіжа Наталля Бордак, якую шмат хто ведае пад псеўданімам Наталка Хвоя, распавяла «Салідарнасці» пра былую спікерку Каардынацыйнай рады Анжаліку Мельнікаву, якая спачатку таямніча знікла з Польшчы, а пасля, выглядае, апынулася ў Беларусі.
Наталля Бордак
— Некаторыя агульныя знаёмыя не вераць ні ў цяперашнія фота, ні ў тое, што пішуць зараз пра Анжаліку.
У 2020‑м яна ладзіла акцыю на роварах са сцягамі па парку. А пасля, былі ў доме яе маці, Анжаліка запрасіла. Дом добры, прыгожа вакол, гарбату пілі. Неяк цяжка ўявіць, што яна магла аказацца са спецслужбаў.
— Але ж дзве кватэры ад яе імя нібыта набылі нядаўна…
— Дзіўна ўсё гэта, загадкава. Калі ў Анжалікі была свая кватэра, якую спачатку апячаталі ворганы, потым вярнулі, — тады навошта яшчэ дзве? І чаму не паказваюць па БТ? Пакажыце ўжо жыўцом!
Нібыта звоніць бацьку, размаўляе, а ён Анжаліцы патэлефанаваць не можа. Дзіўная гісторыя, цьмяная, заблытаная — у Нясвіжы падазрона ставяцца да ўсяго гэтага.
Першы раз Анжаліку пабачыла напрыканцы лета 2020‑га на мітынгу, калі людзі сабраліся насупраць палаца Радзівілаў. Тады ж асабіста і паразмаўляла з ёй. У той час Мельнікава смела выказвалася ў адрас дзеючага рэжыму, і пра фальсіфікацыю выбараў, і пра далейшыя дзеянні, і шмат іншага.
Калі Анжаліку засудзілі, яна з сям’ёй адразу з’ехала. Пісала, што яе папярэдзіла знаёмая. Жонка міліцыянта.
Я з Анжалікай нейкі час яшчэ перапісвалася. І разам былі ў чаце «Свободный Несвиж», у мяне яшчэ застаўся скрын фота ад 8 сакавіка 2021-га: «Павіншуем нашых актыўных змагарак!»
Адзін час Анжаліка нават спрабавала дапамагчы. У 2020-м, калі мяне забралі, напісала пра гэта ў фэйсбуку.
Пасля маіх содняў, ведаючы, што жывем на адну маю пенсію, бо сыноў пазвальнялі, Анжаліка запосціла на сваёй старонцы ў сацсетцы некалькі маіх карцін. Хтосьці нават адгукнуўся і набыў.
— Вы распавядаеце пра мітынгі ды падтрымку Анжалікі. Але ж хтосьці падумае, што калі яна ўжо атрымала заданне, то і паводзіла сябе адпаведна. Ажно з 2020-га.
— Дык мы і на суд да Анжалікі прыходзілі, чалавек 20 сабралася. І відэа было, але ж яе старонка пачышчаная, выдаленыя і відэа, і фотаздымкі. Не ведаю з якога часу, напэўна ж, сама павыдаляла. Калі той суд перанеслі, бо шмат людзей прыйшло, Анжаліка выйшла на прыступкі, ды рэзка раскрытыкавала і працу суда. Выказала ўсё, што хацела ў бок супрацоўнікаў ворганаў. Адзін з якіх настойліва прасіў разыйсціся.
Памятаю, што на старонцы Анжалікі былі фотаздымкі, дзе яна са сваёй маці на фоне мора. І з дачкой быў фотаздымак, калі малодшая ў Беластоку ў школу пайшла, прыгожыя такія.
Прыкра, што гісторыя атрымалася вельмі бруднай. Нібы падмянілі жанчыну: я ж ведала зусім іншую Анжаліку — спагадлівую (прынамсі, так выглядала), прамалінейную, актыўную. Дакладна, стаіш, як на раздарожжы, не ведаючы — верыць ці не?
Калі Анжаліка ўжо ў Беластоку жыла, то больш холадна мне адказвала. А потым і ўвогуле выдаліла. І з чата, і з тэлеграма, вясной 2021-га.
Былая спікерка Каардынацыйнай рады Анжаліка Мельнікава знікла ў сакавіку 2025 года. У апошні раз яе бачылі на Шры-Ланцы, куды ў той жа час прыязджаў Аляксей Лабееў — 32‑гадовы мужчына, з якім у Мельнікавай былі адносіны і які з’яўляецца, як высветлілі журналісты, супрацоўнікам Упраўлення ваеннай контрразведкі КДБ.
Анжаліка Мельнікава пасля знікнення набыла дзве кватэры ў Мінску
Латушка: Не магу выключыць, што на нейкім этапе Мельнікава магла трапіць у пастку спецслужбаў
«Яе «вывелі» з Польшчы». Былая афіцэрка Агенцтва ўнутранай бяспекі — пра тое, што Мельнікава знайшлася
Латушка: Анжаліка Мельнікава ведала шмат адчувальнай інфармацыі
«Яна даўнавата ў Беларусі». Бацька Анжалікі Мельнікавай прызнаўся, што яна жывая і здаровая
Гуляюць скрыншоты з Анжалікай Мельнікавай у трэнажорцы ў Мінску
Каментары