«Яндэкс Музыку» немагчыма слухаць». Беларусы абураныя аб’ёмамі цэнзуры праз расійскі закон аб прапагандзе наркотыкаў
З 1 сакавіка ў Расіі набыў моц закон аб прапагандзе наркотыкаў у інтэрнэце, што закранула многіх артыстаў — музыкі, якія не паспелі да вясны пачысціць свае трэкі ад любых згадак забароненых рэчываў, цяпер выдаляюцца са стрымінгавых сэрвісаў. Карыстальнікі «Яндэкс Музыкі» масава скардзяцца на цэнзуру — прычым не толькі ў Расіі, але і ў Беларусі, дзе гэта адна з самых папулярных платформ.
Людзі абураюцца, што чарговы раз аплацілі падпіску на «Яндэкс Музыку», а слухаць многія любімыя трэкі адтуль немагчыма: з раней паўнавартасных твораў выразаныя кавалкі, у іх запіканыя ці замененыя словы.
«Пяць трэкаў запар суцэльнае запікванне, немагчыма слухаць», — паскардзіўся адзін з карыстальнікаў Трэдс. З ім салідарныя і іншыя беларусы:
«Ну што, як вам сённяшняя «Яндэкс. Музыка», таксама радуе адсутнасць паловы слоў і трэкаў?»
«Мы пачыналі са сцягвання песень на тэлефон, эвалюцыянавалі да зручных музычных сэрвісаў, дзе ўся музыка свету ў цябе ў доступе, а ў выніку вернемся да сцягвання песень на тэлефон», — разважае адзін з каментатараў.
«Час даставаць свой старэнькі mp3-плэер», — пагаджаюцца з ім.
Згодна з новым расійскім законам, пад прапаганду падпадае любы распаўсюд у інтэрнэце інфармацыі пра вытворчасць, ужыванне ці збыт наркотыкаў, а таксама іх прэзентацыя ў якасці нормы ці з пазітыўнай афарбоўкай. На справе любая згадка рэчываў у трэках і кліпах артыстаў, СМІ ці фільмах цягне цяпер на штраф (за першае парушэнне) ці нават пазбаўленне свабоды тэрмінам за паўторнае парушэнне.
Многія артысты паспелі падрыхтавацца да 1 сакавіка, і ў іх трэках цяпер замест згадкі ўмоўнай марыхуаны проста грае музыка — вакал з тэкстам выразаны. Калі не ведаць прычыны, то гучыць дзіўна — нібыта аўтар песні проста забыў словы.
Так, стары хуліганскі трэк групы Jane Air «Junk» адразу пачынаецца без слоў, бо ў арыгінале ён стартуе з радка «Хэш, хэш, они курят хэш».
Дуэт рэпераў «Баста» і Guf у «Только сегодня» таксама «нармалізаваны» — у рэчытатыве «Я, честно говоря, себе плохо представляю, как это жить, ничего не употребляя. Я настолько привык изменять сознание постоянно, как я смогу обходиться без плана. Что это за утро без жирного косячка, и что будет за вечер без стаканчика вискаря?» — вычышчаная нават фраза пра «неўжыванне нічога».
Гурт «АК-47» перазапісаў частку альбома «Berezovskiy» — адтуль прыбраў не толькі згадкі пра наркотыкі, але і негатыўную ацэнку дзейнасці праваахоўных органаў — замест «кілаграма дзвіжухі» цяпер будзе «кілаграм шавухі».
У вядомым жа трэку Guf «Ice Baby» прыбралі, напрыклад, згадку «дылераў». А «Лашадка» Найка Барзова больш не вязе нічога, у арыгінале ж песні яна транспартуе «какаін».
Беларусы таксама адзначылі праблемы з прайграваннем творчасці Loc-Dog, Anacondaz, Makosh і іншых.
Творчасць артыстаў, якія не паспелі ўнесці карэктаванні, на гэты момант выдалілі з пляцовак — цяпер на «Яндэкс Музыка» і «VK музыка» недаступныя, напрыклад, тры альбомы рок-гурта «Агата Крысці». Тое самае закранула Pharaoh, Славу КПСС ды іншых.
Некаторыя з іх ужо паабяцалі фанатам, што музыка вернецца на стрымінгі, як толькі яны «прывядуць яе ў парадак, выкрасліўшы некаторыя словы».
Як і дзе «ачышчаць» аўтарскія трэкі, вырашаюць артысты і лэйблы, каб не атрымаць пасля позву ў суд. Таму папраўленыя версіі трэкаў можна знайсці і на іншых пляцоўках. Напрыклад, трэк «Басты» і «Гуфа» «Только сегодня» нармалізаваны і для Spotify.
На фоне новых абмежаванняў топ-чарты AppStore узначаліў сэрвіс SoundCloud — туды кожны можа загрузіць песні, мінуўшы папярэднюю мадэрацыю. Там ужо можна знайсці некаторыя падборкі без цэнзуры. Таксама людзі масава завісаюць на торэнтках кшталту RuTracker, сцягваючы ўлюбёную творчасць у арыгінале.
«У пашпарце бабулі стаіць дата нараджэння 00.00.1945» — «А ў маёй XX.XX.1940». Як такое можа быць?2
Каментары