На наступным тыдні выйдзе на экраны фільм па кнізе-бестселеры беларускай пісьменніцы
Па кнізе-бестселеры беларускай рускамоўнай пісьменніцы Вольгі Прымачэнкі знялі камедыю «Пяшчотна да сябе», якая выйдзе ў пракат з 5 сакавіка. Аўтарка аднайменнай кнігі-медытацыі ўпершыню паспрабавала сябе ў гэтым фільме і як актрыса.
Стужка расказвае пра паспяховую доктарку-оталарынголага Надзю, якой споўнілася 40 гадоў і якая раптам зразумела, што амаль нічога не ведае пра сябе. Яна штодня дапамагае пацыентам, але ўласныя пачуцці нібыта перастала чуць. Муж пайшоў ад яе два гады таму, адносіны з дачкой-падлеткам становяцца ўсё больш напружанымі. Гераіня шукае зменаў, каб зноў адчуць радасць і любоў да жыцця. Разам з ёй гледачам прапануюць прайсці шэсць своеасаблівых «урокаў пяшчоты» і навучыцца лепш разумець сябе.
У фільме зняліся Карына Разумоўская, Арцём Ткачэнка, Аліса Канашэнкава і іншыя вядомыя расійскія акцёры. Рэжысёрам экранізацыі стаў Іван Кітаеў, сцэнарый напісала Дар’я Грацэвіч.
Сама Вольга Прымачэнка таксама з’явіцца ў карціне ў невялікім эпізодзе — у ролі пакупніцы кватэры. Яна прызналася, што здымкі сталі для яе складаным і хвалюючым досведам: гаварыць тэкст перад вялікай здымачнай групай аказалася няпроста. Паводле яе слоў, акцёрская прафесія патрабуе вялікага таленту і ўмення хутка ўвасабляцца ў розныя вобразы, і гэты досвед дапамог ёй з яшчэ большай павагай паставіцца да працы акцёраў і рэжысёра.
Акрамя таго, пісьменніца агучыла для фільма тэрапеўтычны падкаст «Пяшчотна да сябе», які па сюжэце слухаюць галоўныя гераіні.
Кніга «Пяшчотна да сябе», напісаная ў 2020 годзе на аснове асабістага досведу аўтаркі, закранае тэмы прыняцця сябе, сваіх пачуццяў і межаў, а таксама ўмення клапаціцца пра ўласны ўнутраны стан. Выданне ўвайшло ў пяцёрку самых папулярных нон-фікшн-кніг, а агульны наклад усіх версій перавысіў тры мільёны асобнікаў.
Цяпер чытаюць
Як выглядае стылёвы дом новай рэктаркі Акадэміі мастацтваў коштам паўмільёна даляраў11
Як выглядае стылёвы дом новай рэктаркі Акадэміі мастацтваў коштам паўмільёна даляраў
Пагражаў вайскоўцам раскрыць, хто з іх гомасэксуал, каб выпытаць сакрэты і прадаць Украіне. Вось за што адыёзны функцыянер БРСМ атрымаў 17 гадоў калоніі1212
Каментары