Рэпер Пазнякс, які парваў інтэрнэт песняй пра гавайскую піцу, выпусціў з Мэйбі Бэйбі сумесны трэк «Жабінка-Гродна»
«Не выйшла ни х… Давайце без мату. Калі ласка, прабачце за маю французскую».
Рэпер Пазнякс з Гродна (сапраўднае імя — Дзмітрый Пазняк) працягвае скараць сацсеткі. І гэта насамрэч цікавы феномен — 21‑гадовы хлопец менш чым за год змог стаць шалёна папулярным. Цяпер ён нават скардзіцца, што школьнікі яму не даюць праходу.
Увагу на Пазнякса звярнула іншая папулярная беларуская рэперка — Мэйбі Бэйбі (сапраўднае імя — Вікторыя Лысюк). Некалькі месяцаў таму беларусы масава запісвалі тыктокі пад яе адказ расійскай спявачцы Інстасамцы — Мэйбі Бэйбі вучыла тую правільна называць сваю краіну.
Сёння рэперы выпусцілі сумесны фіт «Жабінка — Гродна». Яны назвалі яго ў гонар сваіх гарадоў — з Жабінкі Мэйбі Бэйбі, а Пазнякс з Гродна.
Клип «Жабинка-Гродно» в сети
Трэк прысвечаны таму, як раскруціцца артысту. Мэйбі Бэйбі выхваляецца сваёй беларускай «свагай» (крутасцю).
Пазнякс жа ўпэўнена чытае:
«В ру-рэпе слишком лёгкий подход.
А я нежданно пророс
На вашем же поле.
Что-то вроде подсолнуха.
Цветочек.
С виду не очень,
Но если расщёлкать,
То будет много кайфового».
Ёсць імавернасць, што расіяне пасля гэтага трэка ўсё ж вывучаць значэнне слова «шуфлядка», бо Мэйбі Бэйбі абяцае:
«Не задвигайте, какие вы гангстеры.
Могу задвинуть их будто шуфлядку».
Увогуле, беларускіх слоў крыху накідалі ў тэкст — ёсць і «бульба» (як жа без гэтага стэрэатыпа), і «калі ласка», і «прабачце». Але ж запазычанняў з англійскай усё ж значна больш.
Першы ўрывак песні набраў за тры дні ў тыкток-акаўнтах артыстаў больш за мільён праглядаў. Каментатары ў захапленні: Пазнякса ўжо называюць легендай і прагназуюць, што праз год ён абыдзе ўсіх папулярных цяпер рэпераў.
А вось у інстаграме аўдыторыя аднеслася больш крытычна. Некаторыя слухачы не ўхвалілі, што хлопец запісаў дуэт з Мэйбі Бэйбі — у тым ліку і праз тое, што яна зусім нядаўна падтрымала вайну.
Нагадаем: пасля таго, як беларускую рэперку ўнеслі ў спіс непажаданых у Расіі артыстаў, яна наведала Дзярждуму і адправіла гуманітарную дапамогу расійскім вайскоўцам.
Каментары