Пад новыя санкцыі ЕС трапілі беларускія банкі. Што зменіцца на практыцы?
Пад новыя санкцыі ЕС, уведзеныя ў рамках 19‑га пакета, трапілі адразу некалькі буйных банкаў, сярод якіх Альфа-Банк. Што гэта азначае для беларусаў і бізнэсу?
Не проста адключэнне ад SWIFT
З 2 снежня пачнуць дзейнічаць абмежаванні ў дачыненні да трох беларускіх банкаў: Альфа-Банка, ВТБ і Сбер Банка. Забарона на правядзенне транзакцый з ЕС прадугледжаная 19‑м пакетам санкцый Еўрасаюза ў дачыненні да Расіі і Беларусі.
Эксперт BEROC Настасся Лузгіна тлумачыць, да якіх наступстваў гэта прывядзе.
«Гэтыя санкцыі — гэта не проста адключэнне банка ад SWIFT, а хутчэй за ўсё поўная забарона на транзакцыі, таму ўладальнікі картак падсанкцыйных банкаў не змогуць разлічвацца імі ў Еўрасаюзе, а таксама аплачваць пакупкі анлайн і падпіскі, калі сродкі павінны праходзіць праз еўрапейскія фінансавыя структуры, — тлумачыць эканаміст.
Цяжкасці з разлікамі могуць чакаць і трымальнікаў еўрапейскіх карт, калі яны захочуць імі расплаціцца ў Беларусі, а крама абслугоўваецца ў адным з банкаў, якія знаходзяцца пад санкцыямі.
Для кліентаў гэтых банкаў любыя грашовыя пераводы, калі транзакцыя звязана з ЕС, стануць недаступнымі як паміж юрыдычнымі, так і фізічнымі асобамі.
Могуць вырасці камісіі за пераводы
«Пры гэтым унутры Беларусі карткі гэтых банкаў незалежна ад аплатнай сістэмы па-ранейшаму працягнуць працаваць, бо забарона тычыцца менавіта ўзаемадзеяння з ЕС», — тлумачыць Лузгіна.
Пры гэтым эксперт адзначае, што новыя санкцыі ў дачыненні да беларускага банкаўскага сектара не з'яўляюцца катастрафічнымі, паколькі застаецца шэраг банкаў, якія не траплялі пад санкцыі і ў тым ліку праводзяць SWIFT-плацяжы ў краіны ЕС.
«Тым не менш гэтыя абмежаванні можна назваць істотнымі, паколькі цяпер да тых банкаў, што ўжо трапілі пад аналагічныя санкцыі, дадаюцца новыя.
Банкі, якія працуюць са SWIFT, і іх карткі працуюць без абмежаванняў, ёсць, але іх выбар становіцца ўсё больш вузкім. Акрамя таго, няма ніякай гарантыі, што банк, абраны замест санкцыйнага, таксама не трапіць пад абмежаванні ў будучыні. Таксама трэба разумець, што памяншэнне колькасці банкаў, здольных праводзіць такія транзакцыі, можа прыводзіць да росту камісій за пераводы.
Але глабальных праблем як у бізнэсе, так і ў фізічных асоб не будзе, пакуль у краіне застаюцца фінансавыя структуры, якія маюць магчымасць працаваць з ЕС без абмежаванняў», — лічыць эксперт.
Эфект ад заходніх санкцый адчуем з усходу
Асноўныя ж санкцый новага пакета накіраваныя на Расію.
Асноўныя негатыўныя наступствы ад 19‑га пакета санкцый эканоміка Беларусі пачне адчуваць пазней і менавіта праз Расію, паколькі яна з'яўляецца асноўным эканамічным партнёрам.
«Калі, напрыклад, з-за зніжэння экспарту энергарэсурсаў эканоміка Расіі будзе адчуваць сур'ёзныя цяжкасці, то гэта, безумоўна, спярша адаб'ецца на стане эканомікі Расіі і расійскага рубля, а потым усё гэта адаб'ецца на Беларусі.
Мы ўжо бачым зніжэнне тэмпаў эканамічнага росту ў Расіі і Беларусі, што абумоўлена ў тым ліку санкцыямі, а калі запавольваецца эканоміка Расіі, то аналагічныя трэнды мы бачым і ў Беларусі», — адзначыла эксперт.
Туск заявіў пра гатоўнасць адкрыць Баброўнікі і Кузніцу з лістапада55
Каментары
Так кажуць усе санкцыёншчыкі.