Дырэктару EPAM сабралі палову сумы на лячэнне жонкі ад раку. Але трэба яшчэ
Як раней пісалася, у жонкі аднаго з дырэктараў EPAM Андрэя Шубадзёрава ў студзені мінулага года выявілі рак кішэчніка. Таццяна прайшла няпростае лячэнне — і спачатку хвароба адступіла. Але, на жаль, новы чэк-ап у чэрвені паказаў рэцыдыў, нагадвае Devby.io.
Андрэй звярнуўся да людзей — і яны адгукнуліся.
— Для нас з Таняй гэта быў новы досвед — вось так адкрыта ў прастору заявіць пра тое, што нам патрэбна дапамога, — кажа Шубадзёраў. — Прычына таму стала тое, што ў нас зусім не было часу на прыняцці рашэнняў: дактары патрабавалі пачаць лячэнне не пазней, чым праз дзесяць дзён пасля таго, як прыйшлі вынікі абследавання.
Андрэй не хавае свайго здзіўлення і захаплення: на яго просьбу пра дапамогу адгукнулася неверагодная колькасць людзей.
— Гэта былі мае калегі, знаёмыя, проста беларусы, якія ніколі не ведалі Таню. Вядома, Таніны сябры і знаёмыя пералічвалі грошы прама. Здзіўляла тое, што былі даволі вялікія сумы.
Гэта падтрымка адназначна надала сілы Тані і мне. Без яе мы наўрад ці змаглі б пачаць лячэнне.
Андрэй кажа, што вельмі ўдзячны калегам з Wargaming і EPAM — дзякуючы ім і ўсім неабыякавым беларусам на платформе ўдалося сабраць больш за 30 тысяч еўра. З улікам тых грошай, якія прыходзілі таксама на рахункі самога Андрэя і Таццяны, — набралася крыху больш паловы сумы, якая патрэбна Шубадзёравым.
— Зараз Таня праходзіць хімію– і імунатэрапію манакланальнымі антыцеламі — гэтых сродкаў якраз хопіць, каб закончыць першы этап.
Што спатрэбіцца зрабіць на другім этапе, будзе зразумела пасля абследавання, якое запланавана на канец кастрычніка — «і тады будуць патрэбныя сродкі на прамянёвую тэрапію», — кажа Андрэй.
— Мы бязмерна ўдзячныя ўсім людзям, якія падтрымаць нас і маральна, і матэрыяльна — гэта настолькі высокі ўзровень эмпатыі і даверу, якога мы раней не сустракалі, — адзначае суразмоўца.
— Таня, вядома, вельмі стамілася фізічна, яна выматаная эмацыйна, бо ў лячэння сур’ёзныя «пабочкі», яно літаральна разбурае яе цела, скуру… Але вера ў людзей і ў сваё выздараўленне адназначна дадае ёй станоўчых эмоцый і дорыць надзею на добры вынік.
Нават невялікая сума згуляе велізарную ролю для Андрэя і Таццяны. Дапамагчы можна, далучыўшыся да збору па спасылцы або пераводам на карту.
Каментары