22 верасня 2025 года на жывёлагадоўчым комплексе «Сардыкі» УПП «Ужыцa-Агра» ў Верхнядзвінскім раёне адбылася экалагічная аварыя. У выніку перапаўнення гноеназапашвальніка «Лагуна» гнаявыя сцёкі пачалі разлівацца па сельскагаспадарчых землях. Частка іх трапіла ў ручай, які ўпадае ў раку Сар’янку, паведамляе Мінпрыроды.
Для ацэнкі маштабу забруджвання былі адразу ж узятыя пробы як саміх гнаявых сцёкаў, так і вады ў ручаі і рацэ. Гэта дазволіць высветліць узровень хімічнага і біялагічнага ўздзеяння на навакольнае асяроддзе.
Па стане на 20:00 таго ж дня скід гнаявой жыжкі ў прыроду быў спынены. Прадпрыемства прыняло меры: пачалі вывозяць сцёкі з перапоўненага назапашвальніка, каб прадухіліць паўторнае разліванне.
Цяпер чакаюцца вынікі лабараторнага кантролю. У залежнасці ад іх кампетэнтныя органы вызначаць меры адказнасці і прымуць рашэнні паводле экалагічнага заканадаўства.
Каментары