З 1 верасня 2025 года ў беларускіх школах дзейнічае забарона на выкарыстанне мабільных тэлефонаў падчас урокаў як для вучняў, так і для настаўнікаў. Аднак заставалася адкрытым пытанне пра смарт-гадзіннікі.
Міністэрства адукацыі дало афіцыйнае тлумачэнне:
«Пастанова №136 не распаўсюджваецца на выкарыстанне смарт-гадзіннікаў (разумных гадзіннікаў)».
Такім чынам, такія гадзіннікі школьнікам можна насіць і карыстацца імі. Раней інфармацыя пра забарону выклікала вялікае абурэнне з боку бацькоў дзяцей.
Заяўленая мэта ўвядзення забароны на тэлефоны ў школе — стварыць больш спрыяльнае асяроддзе для навучання: знізіць фактары, якія адцягваюць увагу, павысіць канцэнтрацыю на ўроку, палепшыць паспяховасць, зменшыць выпадкі булінгу і кібербулінгу, а таксама падштурхнуць дзяцей да большай актыўнасці на перапынках і захавання здароўя.
У дакуменце таксама прадугледжаныя выключэнні. Дзеці, якім неабходна карыстацца мабільнымі прыладамі па медыцынскіх паказаннях, могуць атрымаць дазвол. Акрамя таго, планшэты і электронныя кнігі замест папяровых падручнікаў можна выкарыстоўваць у выпадку праблем з апорна-рухальным апаратам ці іншых хвароб, калі трэба зменшыць вагу школьнага заплечніка.
Пры гэтым планшэты і «электронкі» павінны быць без доступу да інтэрнэту і без функцый мабільнай сувязі. Час выкарыстання такіх прылад мае быць абмежаваны ў адпаведнасці з санітарна-эпідэміялагічнымі нормамі.
Цяпер чытаюць
«Я стаў шчаслівы». Праца на будоўлі прыносіць добрыя грошы, а грамадская актыўнасць — маральную сілу. Былы каліновец Кусь расказаў пра тое, як вярнуў унутраную раўнавагу1313
Каментары