Dana Holdings пазбегла санкцый ЕС: кампанію падмянілі на фірму-пустышку

Структура, якая валодала будаўнічай бізнес-імперыяй сям'і Карычаў, вядомых маштабнымі будоўлямі ў Мінску і сувязямі з сям'ёй Аляксандра Лукашэнкі, пазбегла санкцый Еўрапейскага Саюза. Замест кіпрскай кампаніі Dana Holdings пад абмежаванні трапіла фірма-клон з рэгістрацыяй у Мінску. Кіпрскі суўладальнік падсанкцыйных беларускіх кампаній сям'і Карычаў працягваў атрымліваць дывідэнды і пасля ўвядзення санкцый.

Нараджэнне клона

Упершыню Dana Holdings з'явілася ў санкцыйным спісе ЕС у снежні 2020 года. Але аформілі яе незвычайна — разам з яшчэ адной кампаніяй.

У табліцы суб'ектаў, якія трапілі пад санкцыі ЕС, запіс выглядаў наступным чынам: Dana Holdings/Dana Astra. Магло падацца, што санкцыі ўвялі супраць кіпрскай кампаніі Dana Holdings, якая праз іншыя кіпрскія фірмы-пракладкі валодала ўсімі асноўнымі актывамі сям'і Карычаў у Беларусі, а таксама супраць ЗТАА «Дана Астра» — найбуйнейшай з беларускіх фірмаў, якія належаць гэтаму холдынгу (па памеры актываў на 2020 год). Але аказалася інакш.

Пра Карычаў і Dana Holdings

У графе «ідэнтыфікуючая інфармацыя» для абедзвюх фірмаў у спісе ЕС у снежні 2020 года ўказалі толькі адзін адрас і ўліковы нумар плацельшчыка. Яны адносіліся да беларускага ЗТАА «Дана Астра».

Па Dana Holdings ідэнтыфікуючай інфармацыі не было. Можна было меркаваць, што Еўрапейская служба знешніх сувязяў, якая рыхтуе санкцыйныя пакеты для галасавання ў Радзе ЕС, злучыла назвы гэтых дзвюх фірмаў па памылцы. Бо на рыэлтарскіх сайтах беларускага забудоўшчыка менавіта так часам і падпісвалі.

Але ў сакавіку 2021 года Еўрапейскі Саюз, здавалася б, памылку выправіў. Запіс Dana Holdings/Dana Astra у санкцыйным спісе падзялілі. Абмежаванні супраць Dana Holdings вынеслі ў асобны радок, ужо з уласным нумарам падаткаплацельшчыка і адрасам, але афіцыйная дата ўвядзення санкцый засталася ранейшай — 17 снежня 2020 года.

Насамрэч жа, туды ўнеслі даныя іншай фірмы, якая не існавала на момант першапачатковага ўвядзення санкцый супраць Dana Holdings.

Дакладней, фірма пад такім рэгістрацыйным нумарам існавала, але называлася яна ТАА «Гандальгасбуд» і займалася гандлем будаўнічымі матэрыяламі ў беларускім горадзе Беразіно. Яе ўладальнік, беларус Міхаіл Казакевіч, не меў відавочных сувязяў з бізнесам Карычаў. Праз паўтара месяцы пасля ўвядзення санкцый супраць Dana Holdings, 8 лютага 2021 года, беларуская кампанія сям'і Карычаў «Дана Астра» стала ўладальнікам «Гандальгасбуда» і перайменавала яго ў ТАА «Дана Холдынгз», стварыўшы такім чынам клон-пустышку сваёй галаўной кіпрскай кампаніі. А 27 сакавіка 2021 года ЕС падмяніў Dana Holdings, якую ўнёс у санкцыйны спіс першапачаткова, на гэты новаствораны клон.

Пра тое, што ЕС першапачаткова ўводзіў санкцыі менавіта супраць кіпрскай Dana Holdings, можа сведчыць рашэнне суда ў Люксембургу. У 2024 годзе ён адмовіў Багалюбу Карычу ў зняцці еўрапейскіх абмежаванняў на падставе таго, што серб «быў цесна звязаны з Dana Holdings і яе былой даччынай кампаніяй «Дана Астра». Фірмай «Дана Астра» валодала кіпрская Dana Holdings (праз іншыя кіпрскія пракладкі), а не беларуская ТАА «Дана Холдынгз».

У лютым 2021 года, прыкладна за месяц да падмены Dana Holdings у санкцыйным спісе ЕС, «Дана Астра» перадала ўладанне над фірмай-клонам харвату Дэяну Лабану. Чалавека з такім жа імем журналісты знайшлі на фота побач з Багалюбам Карычам у допісе на Facebook ад 5 красавіка 2021 года. У ім Карыч называе супрацоўнікаў іх кампаніі вялікай міжнароднай сям'ёй і расказвае, што ў той дзень ён наведаў сваіх «кумоў» у Харватыі.

Павялічыць

Такім чынам, на момант першага ўнясення Dana Holdings у санкцыйны спіс ЕС, кампаніі з такой назвай у Беларусі не існавала. Кіпрская ж Dana Holdings Limited, якая кантралявала ўсе вядомыя будаўнічыя праекты сям'і Карычаў у Беларусі, так і не трапіла пад еўрапейскія абмежаванні. Вялікабрытанія таксама ўнесла ў свой санкцыйны спіс не кіпрскую Dana Holdings, а яе беларускага клона.

Больш падрабязна чытайце тут.

• 0
• 0
• 3
• 1
• 0
• 0
• 3
• 0