Новая кіраўніца ПВТ расказала, як зменіцца праца з ІТ-кампаніямі ў Беларусі
Ганна Рабава, нядаўна прызначаная кіраўніком Парка высокіх тэхналогій (ПВТ), у інтэрв’ю «Першаму інфармацыйнаму» заявіла, што кардынальных рэформаў у ПВТ пакуль не плануецца — ён развіваецца стабільна. Аднак ёсць пэўныя акцэнты, на якіх цяпер хоча засяродзіцца дзяржава.
На першым пасяджэнні назіральнай рады ПВТ прэм’ер-міністр Беларусі Аляксандр Турчын, па словах Ганны Рабавай, вылучыў два галоўныя кірункі:
- стварэнне адкрытага і эфектыўнага канала, праз які распрацоўкі ПВТ-рэзідэнтаў будуць трапляць у эканоміку і дзяржаўныя структуры;
- падтрымка асяроддзя, дзе з’яўляюцца новыя таленавітыя спецыялісты і кампаніі, у тым ліку праз супрацоўніцтва з адукацыяй для падрыхтоўкі інжынерных кадраў.
Рабава таксама адзначыла, што асобнай тэндэнцыяй цяпер вылучаюцца крыптакампаніі. Акрамя таго, цікава развіваецца напрамак стварэння праграмна-апаратных комплексаў — гэта не проста софт, а тэхнічныя інавацыі.
Што да спецыялістаў, якія раней выехалі з краіны, то кіраўніца ПВТ падкрэсліла, што, маўляў, для ўсіх, хто хоча працаваць і прыносіць карысць Беларусі, дзверы адчыненыя. ІТ-сфера вельмі дынамічная і мабільная, але любоў да радзімы, па словах чыноўніцы, ніхто не адмяняў.
«Тут, напэўна, гаворка будзе ісці пра тое, наколькі гэтыя людзі гатовыя вярнуцца, гатовыя працаваць на тых правілах і ўстаноўках, якія дае наша краіна. І наколькі мы са свайго боку прапануем рэжым, умовы, якія максімальна дазваляюць ім задаволіць свае амбіцыі. Таму тут такі двухбаковы рух», — сказала Рабава.
На сёння ў ПВТ зарэгістраваныя больш за 1000 кампаній, у якіх працуюць каля 60 тысяч чалавек.
Нагадаем, што Ганна Рябова стала кіраўніцай ПВТ у канцы мая. Да гэтага яна была намесніцай міністра сувязі і інфарматызацыі і займалася развіццём лічбавай эканомікі і інавацый.
Цяпер чытаюць
Беларус, які ваяваў за Украіну, распавёў, чым яго зачаравала каханка Іна Кардаш, агентка КДБ23
Беларус, які ваяваў за Украіну, распавёў, чым яго зачаравала каханка Іна Кардаш, агентка КДБ
Учора — у лукашэнкаўскай турме, сёння — у Кіеве дапамагае ўкраінцам выжыць. Былы палітвязень і сваяк Ціханоўскай стаў валанцёрам у Пункце нязломнасці66
Каментары