Што IT-бізнэс думае пра Ганну Рабаву, новую кіраўніцу Парка высокіх тэхналогій?
Спадзяванні ёсць у ахвотных падаіць дзяржаву, а буйной айцішцы проста абыякава, хто на чале ПВТ.
Новай кіраўніцай Парка высокіх тэхналогій стала Ганна Рабава. Раней яна займала пасаду намесніцы міністра сувязі і інфарматызацыі.
Суразмоўцы «Нашай Нівы» апісваюць чыноўніцу пераважна прыязна: маўляў, прыемна, калі беларускі чыноўнік у такіх тонкіх сферах, як ІТ, часам разумее, пра што кажа.
У Мінсувязі Рабава курыравала інфарматызацыю. Што гэта значыць? У тым ліку яна мела ўплыў на размеркаванне бюджэту на праекты па лічбавізацыі. Таму тыя кампаніі, якія дзейнічалі на ўнутраным рынку, вядомы Рабавай, а яна сама вядома менеджарам і ўласнікам.
Па словах суразмоўцаў «Нашай Нівы», перадусім чаканні ад Рабавай існуюць вось у такіх кампаній — зацікаўленых у дзяржаўных падрадах.
«З яе фігурай звязваюць лабізм новых праектаў, выбіванне бюджэтаў, падтрымку беларускіх кампаній на беларускім жа рынку. Словам, некаторыя спадзяюцца перабіць фінансавы голад замовамі ад самага вялікага заказчыка — дзяржавы. Але наколькі абгрунтаваныя такія спадзяванні я не ведаю», — кажа адзін з IT-бізнэсменаў.
«Тое, чым яна ганарыцца, — гэта збольшага бесталковая «Вітрына лічбавых праектаў Беларусі»… Я б чакаў развароту айцішкі ўнутр краіны», — пагадзіўся іншы менеджар.
Сёння частка беларускай ІТ-галіны насамрэч знаходзіцца ў заняпадзе.
Тыя гульцы, якія змаглі вывезці людзей і захаваць кантракты, або знайсці новыя — яны, як кажуць самі менеджары, «больш цікавяцца ўмовамі для ІТ у суседніх юрысдыкцыях, чым у Беларусі».
Тыя ж кампаніі, у асноўным з дзясяткамі ці сотнямі супрацоўнікаў, якія не здолелі знайсці сябе на замежных рынках пасля 2022 года, у асноўным спадзяюцца на замовы на рынках СНД. З улікам спецыфікі, вядома, на гэтых рынках сапраўды самы вялікі замоўца — гэта дзяржава і калядзяржаўныя камерцыйныя структуры.
У некаторых сферах беларускага ІТ насамрэч існуюць крыўды і непаразуменні ў ацэнцы таго, што многія па-сапраўднаму вялікія праекты па лічбавізацыі (некаторыя з якіх скончыліся пшыкам) дзяржава аддавала замежным выканаўцам.
«Калі ўплыву Рабавай хопіць адкусіць бюджэтных грошай у адных і перакласці іх у кішэні ІТ-кампаній — ну, думаю, вось гэтага ад яе чакаюць тыя, хто хоча падаіць дзяржаву», — дадаў менеджар іншай кампаніі.
Апытаныя сыходзяцца ў думцы, што спадзяванні з фігурай новага начальніка звязвае абсалютная меншасць бізнэсаў. Некаторыя, нават будучы рэзідэнтамі ПВТ, даведваліся аб прызначэнні Рабавай ад «Нашай Нівы».
«Можна прызначыць туды Рабаву, можна прызначыць туды Каткавец. У прынцыпе, якая розніца? Яны нічым не займаюцца. Адміністрацыя ПВТ, па сутнасці, сядзіць на прыёме новых рэзідэнтаў і на размеркаванні сабраных праз унёскі грошай (1% ад абароту кожнага рэзідэнта), стаўшы ўжо даўно такім айцішным выканкамам: дайце нам да абеду справаздачу з патрэбнымі паказчыкамі, сцяг вывесьце, зганіце супрацоўнікаў заданаціць.
Таму бізнэсу ад адміністрацыі ПВТ нічога не трэба — абы б толькі не перашкаджалі. А ніякіх фундаментальных праблем ІТ-галіны з замежнымі банкамі, партнёрамі, пераездамі і іншым яна вырашыць не зможа», — кажа іншы бізнэсмен, чый бізнэс не зацікаўлены ў супрацоўніцтве з дзяржавай.
«Санкцый новая адміністрацыя ПВТ не здыме, прымаць плацяжы банкі не прымусіць, кліентаў працаваць з выканаўцамі з РБ не прымусяць таксама. І ўвогуле гэта не яе справа: вось гэтымі рэчамі, па частцы «сувязі са знешнім светам», у Эміратах і Венгрыі займаецца [былы кіраўнік ПВТ Усевалад] Янчэўскі. Не асабліва паспяхова, трэба сказаць. Для таго, каб вярнуць нейкае жыццё ў ІТ, патрэбны зусім іншыя лекі», — рэзюмаваў іншы суразмоўца.
Цяпер чытаюць
Спальныя месцы ў «Мінск-Свеце» могуць выклікаць клаўстрафобію. Як эканомяць прастору ў сучасных кватэрах-студыях9
Каментары