Аляксандр Лукашэнка расказаў, як жахнуўся несанкцыянаваным звалкам у Мінскім раёне. Пра гэта ён распавёў на нарадзе па пытаннях абыходжання з адкідамі і выкарыстання другасных матэрыяльных рэсурсаў.
Лукашэнка сказаў, што пакуль поўнасцю не вырашаны пытанні кантэйнернага збору камунальных адкідаў. «Дачнікі, жыхары малых гарадоў часта проста не ведаюць, куды выкідваць непатрэбнае. Ведаюць… Я, можна сказаць, выпадкова [выявіў]. Вось я прэм'еру гаварыў — у яго вобласці ўчарашняй (Аляксандр Турчын да прэм'ерскай пасады ўзначальваў Мінскі аблвыканкам. — Рэд.) па Мінскім раёне. Я праехаў і жахнуўся», — сказаў Лукашэнка.
«Мінскі раён — гэта прыбіральня горада-героя Мінска. Што там робіцца — гэта кашмар. Адразу на ўскраіне лесу, ніхто не турбуе сябе: заехаў самазвал, выкінулі… Чаго толькі няма! Я спецыяльна спыніўся, паглядзеў: старыя халадзільнікі, пластмаса, шкло, рознае бытавое смецце. Гэта пад Мінскам!» — абураўся ён.
Лукашэнка сказаў, што другасныя рэсурсы — гэта рэзерв для росту эканомікі. Ён нагадаў, што 11 гадоў таму гэта тэма ўжо абмяркоўвалася ў такім жа складзе, і з таго часу было прынята шмат праграм і мерапрыемстваў, укладзены бюджэтныя рэсурсы.
Ён запатрабаваў далажыць аб далейшай стратэгіі работы з усімі відамі адкідаў і загадаў «вылізаць» краіну ў Год добраўпарадкавання.
Лукашэнка таксама прапанаваў вярнуцца да пытання дэпазітнай сістэмы абароту тары. Ён нагадаў, што ўрад у 2019 годзе не змог «выразна абгрунтаваць» неабходнасць стварэння сумесна з прыватным інвестарам сістэмы дэпазітна-закладнога абароту шкляной і пластыкавай тары. «Што з пілотнымі праектамі, якія так гучна анансаваліся? Можа быць, сёння трэба вярнуцца да гэтай тэмы, але ўжо на базе кааперацыі холдынгу «Белрэсурсы» і Беларускай шкляной кампаніі?» — сказаў ён.
Цяпер чытаюць
Брат беларускай каралевы прыгажосці трапіў у рэанімацыю ў Азербайджане4
Каментары