Папа Леў XIV: амерыканскі місіянер у Перу, які крытыкаваў віцэ-прэзідэнта ЗША. Што вядома пра новага Папу

Крыніца брытанскай газеты Telegraph у Ватыкане ахарактарызавала новага Папу так: «Ён не ўваходзіў у лік відавочных кандыдатаў, але ён ведае ўсіх, правёў 30 гадоў на місіях, размаўляе на некалькіх мовах. Яго гады ў Перу робяць яго найменш «амерыканскім» з усіх амерыканскіх кардыналаў. Але ён разумее Амерыку і здольны звяртацца да яе народа — а гэта важна ў эпоху Трампа».

Сайт каталіцкіх журналістаў collegeofcardinalsreport.com называе яго погляды блізкімі да папярэдняга папы Францішка.

Прэво нарадзіўся ў Чыкага, але большую частку сваёй кар’еры правёў у Перу: спачатку як місіянер, а затым як арцыбіскуп. У 2015 годзе ён атрымаў перуанскае грамадзянства і кіраваў епархіяй у горадзе Чыклаё да 2023 года, калі папа Францішак прызначыў яго кіраўніком Дыкастэрыі па справах біскупаў. Гэты орган адказвае за разгляд кандыдатур на вышэйшыя царкоўныя пасады па ўсім свеце.

У інтэрв’ю Vatican News, неўзабаве пасля прызначэння ў Рым, будучы пантыфік сказаў: «Я па-ранейшаму лічу сябе місіянерам. Маё пакліканне, як і ў кожнага хрысціяніна, — быць місіянерам, абвяшчаць Евангелле ў любым кутку свету».

У тым жа інтэрв’ю ён падкрэсліваў, што біскуп павінен быць перш за ўсё пастырам, блізкім да сваёй паствы, а не мэнэджэрам, і важна не «ізалявацца ў палацы», а быць адкрытым да зносін з людзьмі.

Гэтаму ж прынцыпу адкрытасці прытрымліваўся Францішак, якога новы папа Леў XIV згадаў у сваёй прамове пасля абрання. «Давайце будзем памятаць пра слабы голас папы Францішка, які бласлаўляе Рым», — заклікаў ён.

Прэво таксама двойчы выбіраўся генералам-прыёрам — найвышэйшым кіраўніком аўгустынскага ордэна, рэлігійнай супольнасці XIII стагоддзя, заснаванай святым Аўгусцінам.

Акрамя таго, ён узначальваў Папскую камісію па справах Лацінскай Амерыкі — рэгіёна, дзе цяпер пражывае найбольшая колькасць католікаў у свеце.

У Рыме Прэво ўдзельнічаў у адной з найважнейшых рэформаў пантыфікату Францішка — уключэнні трох жанчын у калегію, якая галасуе за кандыдатуры біскупаў, вылучаных на зацвярджэнне Папу.

Да выбараў лічылася, што адносная маладосць Прэво можа сыграць супраць яго — кардыналы маглі не захацець абіраць папу, пантыфікат якога можа працягнуцца два дзесяцігоддзі або даўжэй.

За што Прэво крытыкаваў Вэнса і палітыку Белага дома

Прэзідэнт ЗША Дональд Трамп павіншаваў першага ў гісторыі папу-амерыканца, дадаўшы, што гэта вялікі гонар для Амерыкі.

Аднак сусветныя СМІ звяртаюць увагу, што ў сваіх сацыяльных сетках Прэво крытыкаваў палітыку новай амерыканскай адміністрацыі як мінімум па адным пытанні — стаўленні да мігрантаў. Як нагадвае The New Republic, адзін з пастоў, рэтвітнуты Прэво ў 2018 годзе (падчас першага прэзідэнцкага тэрміну Трампа), гаварыў: «Няма нічога нават аддалена хрысціянскага, амерыканскага або маральна апраўданага ў палітыцы, якая адбірае дзяцей у бацькоў і саджае іх у клеткі. Гэта робіцца ад нашага імя, і ганьба кладзецца на ўсіх нас».

У іншым допісе, які перапосціў Прэво, гучыць рытарычнае пытанне, ці бачыць адміністрацыя ЗША пакуты, выкліканыя іх палітыкай у дачыненні да нелегальных мігрантаў.

У лютым гэтага года ён паспрачаўся з віцэ-прэзідэнтам ЗША Джэй Дзі Вэнсам, які сказаў: «Ёсць хрысціянскае разуменне: спачатку ты любіш сваю сям’ю, потым — бліжняга, потым — супольнасць, потым — суграмадзян, і толькі пасля гэтага — астатні свет. Многія на крайнім левым флангу ўсё гэта цалкам перавярнулі».

Будучы папа падзяліўся калонкай National Catholic Reporter пад загалоўкам: «Джэй Дзі Вэнс памыляецца: Ісус не просіць нас ранжыраваць сваю любоў».

Што вядома пра яго бацькоў і кар’еру

Будучы папа нарадзіўся 14 верасня 1955 года ў Чыкага.

Яго бацька, Луі Марыус Прэво, быў ветэранам Другой сусветнай вайны французска-італьянскага паходжання, а маці, Мілдрэд Марцінес, мела іспанскае паходжанне.

Прозвішча новага папы пішацца «Prevost», яно мае французскае паходжанне і ў франкамоўным асяроддзі сапраўды вымаўляецца як «Прэво». Аднак кардынал нарадзіўся ў ЗША, дзе неанглійскія прозвішчы часта вымаўляюць гэтак, як яны пішуцца. Беларускі сайт Навінаў Ватыкана піша Прэвост.

Прэво атрымаў сярэднюю адукацыю ў малой семінарыі Аўгусцінскага ордэна ў 1973 годзе. Закончыўшы бакалаўрыят па матэматыцы ў прыватным каталіцкім універсітэце Віланова ў 1977 годзе, ён далучыўся да Аўгусцінскага ордэна. 19 чэрвеня 1982 года ён быў пасвечаны ў святары.

Будучы папа атрымаў ступень магістра багаслоўя ў Каталіцкім багаслоўскім саюзе ў Чыкага, а таксама ліцэнцыят і доктарскую ступень у галіне кананічнага права ў Папскім універсітэце Святога Тамаша Аквінскага ў Рыме.

Як адзначае National Catholic Reporter, адукацыя ў галіне кананічнага права можа супакоіць скептыкаў, занепакоеных магчымымі пагрозамі для традыцый каталіцкай царквы.

Прэво далучыўся да місіі аўгусцінцаў у Перу ў 1985 годзе, і з таго часу яго жыццё было цесна звязана з гэтай краінай.

Па заўвазе National Catholic Reporter, новы папа — паліглот: ён размаўляе на англійскай, іспанскай, італьянскай, французскай і партугальскай мовах, чытае па-лацінску і па-нямецку.

• 10
• 0
• 0
• 0
• 0
• 0
• 0
• 1