Papa Leŭ XIV: amierykanski misijanier u Pieru, jaki krytykavaŭ vice-prezidenta ZŠA. Što viadoma pra novaha Papu

Krynica brytanskaj haziety Telegraph u Vatykanie acharaktaryzavała novaha Papu tak: «Jon nie ŭvachodziŭ u lik vidavočnych kandydataŭ, ale jon viedaje ŭsich, pravioŭ 30 hadoŭ na misijach, razmaŭlaje na niekalkich movach. Jaho hady ŭ Pieru robiać jaho najmienš «amierykanskim» z usich amierykanskich kardynałaŭ. Ale jon razumieje Amieryku i zdolny źviartacca da jaje naroda — a heta važna ŭ epochu Trampa».

Sajt katalickich žurnalistaŭ collegeofcardinalsreport.com nazyvaje jaho pohlady blizkimi da papiaredniaha papy Franciška.

Prevo naradziŭsia ŭ Čykaha, ale bolšuju častku svajoj karjery pravioŭ u Pieru: spačatku jak misijanier, a zatym jak arcybiskup. U 2015 hodzie jon atrymaŭ pieruanskaje hramadzianstva i kiravaŭ jeparchijaj u horadzie Čykłajo da 2023 hoda, kali papa Francišak pryznačyŭ jaho kiraŭnikom Dykasteryi pa spravach biskupaŭ. Hety orhan adkazvaje za razhlad kandydatur na vyšejšyja carkoŭnyja pasady pa ŭsim śviecie.

U intervju Vatican News, nieŭzabavie paśla pryznačeńnia ŭ Rym, budučy pantyfik skazaŭ: «Ja pa-raniejšamu liču siabie misijanieram. Majo paklikańnie, jak i ŭ kožnaha chryścijanina, — być misijanieram, abviaščać Jevanhielle ŭ lubym kutku śvietu».

U tym ža intervju jon padkreślivaŭ, što biskup pavinien być pierš za ŭsio pastyram, blizkim da svajoj pastvy, a nie menedžeram, i važna nie «izalavacca ŭ pałacy», a być adkrytym da znosin ź ludźmi.

Hetamu ž pryncypu adkrytaści prytrymlivaŭsia Francišak, jakoha novy papa Leŭ XIV zhadaŭ u svajoj pramovie paśla abrańnia. «Davajcie budziem pamiatać pra słaby hołas papy Franciška, jaki błasłaŭlaje Rym», — zaklikaŭ jon.

Prevo taksama dvojčy vybiraŭsia hienierałam-pryjoram — najvyšejšym kiraŭnikom aŭhustynskaha ordena, relihijnaj supolnaści XIII stahodździa, zasnavanaj śviatym Aŭhuścinam.

Akramia taho, jon uznačalvaŭ Papskuju kamisiju pa spravach Łacinskaj Amieryki — rehijona, dzie ciapier pražyvaje najbolšaja kolkaść katolikaŭ u śviecie.

U Rymie Prevo ŭdzielničaŭ u adnoj z najvažniejšych reformaŭ pantyfikatu Franciška — uklučeńni troch žančyn u kalehiju, jakaja hałasuje za kandydatury biskupaŭ, vyłučanych na zaćviardžeńnie Papu.

Da vybaraŭ ličyłasia, što adnosnaja maładość Prevo moža syhrać suprać jaho — kardynały mahli nie zachacieć abirać papu, pantyfikat jakoha moža praciahnucca dva dziesiacihodździ abo daŭžej.

Za što Prevo krytykavaŭ Vensa i palityku Biełaha doma

Prezident ZŠA Donald Tramp pavinšavaŭ pieršaha ŭ historyi papu-amierykanca, dadaŭšy, što heta vialiki honar dla Amieryki.

Adnak suśvietnyja ŚMI źviartajuć uvahu, što ŭ svaich sacyjalnych sietkach Prevo krytykavaŭ palityku novaj amierykanskaj administracyi jak minimum pa adnym pytańni — staŭleńni da mihrantaŭ. Jak nahadvaje The New Republic, adzin z pastoŭ, retvitnuty Prevo ŭ 2018 hodzie (padčas pieršaha prezidenckaha terminu Trampa), havaryŭ: «Niama ničoha navat addalena chryścijanskaha, amierykanskaha abo maralna apraŭdanaha ŭ palitycy, jakaja adbiraje dziaciej u baćkoŭ i sadžaje ich u kletki. Heta robicca ad našaha imia, i hańba kładziecca na ŭsich nas».

U inšym dopisie, jaki pierapościŭ Prevo, hučyć rytaryčnaje pytańnie, ci bačyć administracyja ZŠA pakuty, vyklikanyja ich palitykaj u dačynieńni da nielehalnych mihrantaŭ.

U lutym hetaha hoda jon paspračaŭsia ź vice-prezidentam ZŠA Džej Dzi Vensam, jaki skazaŭ: «Jość chryścijanskaje razumieńnie: spačatku ty lubiš svaju siamju, potym — bližniaha, potym — supolnaść, potym — suhramadzian, i tolki paśla hetaha — astatni śviet. Mnohija na krajnim levym fłanhu ŭsio heta całkam pieraviarnuli».

Budučy papa padzialiŭsia kałonkaj National Catholic Reporter pad zahałoŭkam: «Džej Dzi Vens pamylajecca: Isus nie prosić nas ranžyravać svaju luboŭ».

Što viadoma pra jaho baćkoŭ i karjeru

Budučy papa naradziŭsia 14 vieraśnia 1955 hoda ŭ Čykaha.

Jaho baćka, Łui Maryus Prevo, byŭ vieteranam Druhoj suśvietnaj vajny francuzska-italjanskaha pachodžańnia, a maci, Miłdred Marcinies, mieła ispanskaje pachodžańnie.

Proźvišča novaha papy pišacca «Prevost», jano maje francuzskaje pachodžańnie i ŭ frankamoŭnym asiarodździ sapraŭdy vymaŭlajecca jak «Prevo». Adnak kardynał naradziŭsia ŭ ZŠA, dzie nieanhlijskija proźviščy časta vymaŭlajuć hetak, jak jany pišucca. Biełaruski sajt Navinaŭ Vatykana piša Prevost.

Prevo atrymaŭ siaredniuju adukacyju ŭ małoj sieminaryi Aŭhuścinskaha ordena ŭ 1973 hodzie. Zakončyŭšy bakałaŭryjat pa matematycy ŭ pryvatnym katalickim univiersitecie Viłanova ŭ 1977 hodzie, jon dałučyŭsia da Aŭhuścinskaha ordena. 19 červienia 1982 hoda jon byŭ paśviečany ŭ śviatary.

Budučy papa atrymaŭ stupień mahistra bahasłoŭja ŭ Katalickim bahasłoŭskim sajuzie ŭ Čykaha, a taksama licencyjat i doktarskuju stupień u halinie kananičnaha prava ŭ Papskim univiersitecie Śviatoha Tamaša Akvinskaha ŭ Rymie.

Jak adznačaje National Catholic Reporter, adukacyja ŭ halinie kananičnaha prava moža supakoić skieptykaŭ, zaniepakojenych mahčymymi pahrozami dla tradycyj katalickaj carkvy.

Prevo dałučyŭsia da misii aŭhuścincaŭ u Pieru ŭ 1985 hodzie, i z taho času jaho žyćcio było ciesna źviazana z hetaj krainaj.

Pa zaŭvazie National Catholic Reporter, novy papa — palihłot: jon razmaŭlaje na anhlijskaj, ispanskaj, italjanskaj, francuzskaj i partuhalskaj movach, čytaje pa-łacinsku i pa-niamiecku.

• 8
• 0
• 0
• 0
• 0
• 0
• 0
• 1