Жанчына нарадзіла чужое дзіця. Якую памылку зрабілі ў клініцы падчас ЭКА
Жанчына ў Аўстраліі нарадзіла чужое дзіця пасля таго, як у клініцы па лячэнні бясплоддзя ёй выпадкова падсадзілі эмбрыёны іншай жанчыны. Інцыдэнт адбыўся ў медыцынскім цэнтры Monash IVF у Брысбене, штат Квінслэнд, піша Бі-бі-сі.
Як паведамляюць аўстралійскія СМІ, прычынай блытаніны падчас штучнага апладнення стаў чалавечы фактар.
Клініка прызнала памылку, назваўшы яе «адзіночным выпадкам», і заявіла, што ўжо прыняла дадатковыя меры, каб прадухіліць падобныя інцыдэнты ў будучыні.
«Ад імя Monash IVF хачу папрасіць прабачэння за тое, што адбылося», — сказаў генеральны дырэктар Міхаэль Кнаап, дадаўшы, што ўсе ў клініцы «спустошаныя» памылкай.
Паводле прадстаўніка Monash IVF, праблему выявілі ў лютым, калі кліенты папрасілі перавесці замарожаныя эмбрыёны, што засталіся пасля ЭКА, у іншую клініку.
«Мы выявілі няправільную колькасць эмбрыёнаў у сховішчы», — заявілі ў Monash IVF. Там таксама пацвердзілі, што эмбрыён, узяты ў іншай пацыенткі, памылкова размарозілі і перанеслі не той жанчыне, у выніку чаго яна нарадзіла чужое дзіця.
Клініка пачала ўнутранае расследаванне, інцыдэнт таксама перададзены на разгляд медыцынскіх рэгулятараў.
Генеральны дырэктар медустановы пры гэтым запэўніў, што гэта быў адзіночны выпадак.
Мінулага года гэта ж клініка выплаціла 56 млн аўстралійскіх долараў сотням пацыентаў, чые эмбрыёны памылкова знішчылі.
Падчас расследавання высветлілася, што каля 35% эмбрыёнаў, якія насамрэч былі нармальнымі і маглі прывесці да паўнавартаснай цяжарнасці, прызналі дэфектнымі ў выніку памылковага скрынінгу.
Не першы выпадак
У лютым Хрысціна Мюрэй з ЗША падала ў суд на клініку, дзе ёй рабілі працэдуру ЭКА.
У выніку памылкі яна вынасіла і нарадзіла хлопчыка, які біялагічна ёй не належаў.
Хоць Мюрэй і абраны ёй донар спермы былі белымі, дзіця аказалася афраамерыканцам.
Такім чынам, замест уласнага малога, якога яна чакала, жанчына стала міжвольнай сурагатнай маці для іншай пары.
Пасля кансультацый з юрыстамі жанчына добраахвотна адмовілася ад апекі над дзіцём, паколькі ў яе не было шанцаў аспрэчыць правы біялагічных бацькоў.
Зараз хлопчык жыве з імі ў іншым штаце пад іншым імем.
Цяпер чытаюць
Закінутую сядзібу Багдановічаў пераробяць у буціковы гатэль ФОТЫ4
Каментары
А ў дадзеным канкрэтным выпадку тэхналогія дазваляе нарадзіцца новаму дзіцяці. Нягледзячы на памылкі, якія часам здараюцца, нараджаецца новае жыццё. Сапраўды, "мярзотна".