Як Бондарава дапамагла сабраць грошы палітвязням. Стрыжак распавёў пра наступствы першакрасавіцкага жарту «Нашай Нівы»
1 красавіка «Наша Ніва» апублікавала жарт пра эвакуацыю з Беларусі Вольгі Бондаравай. Кіраўнік фонда «Байсол» Андрэй Стрыжак пагадзіўся нам падыграць. Цяпер ён распавёў «Еўрарадыё» пра вынікі гэтага.
«У гэты дзень у нас была рэкордная наведвальнасць сайта. І мы сабралі больш за 3500 еўра для людзей, якім патрэбная дапамога», — кажа Стрыжак.
Ён дадае, што сёння не так проста збіраць данаты, і трэба шукаць магчымасць выклікаць эмоцыі, каб чалавек адгукнуўся на просьбу пра дапамогу.
«Плач Яраслаўны, што «данаты не збіраюцца, збор не закрываецца», не цікавы нікому абсалютна. І таму такія вось спосабы прыцягнення ўвагі я лічу даступнымі і магчымымі. Ясна, што яны будуць выклікаць абурэнне, бурныя эмоцыі, але данат — гэта заўсёды эмоцыя. І менавіта таму мы выкарысталі гэты метад. І дзякуючы гэтаму закрылі некалькі збораў, якія іншым спосабам наўрад ці закрыліся», — кажа ён.
Таксама, паводле слоў Стрыжака, у гэтым годзе «Байсол» ужо эвакуіраваў 29 чалавек. І працягвае гэту працу.
У сакавіку стала вядома, што Вольгу Бондараву пасадзілі на 13 сутак. Жанчына з 2020 года актыўна змагаецца з усім, што падаецца ёй пагрозай для «рускага свету» і «традыцыйных каштоўнасцяў». Пры гэтым яна часта блытае берагі, накідваючыся з абвінавачваннямі на высокіх чыноўнікаў, сілавікоў і нават на членаў сямейнага клана самога Лукашэнкі.
Каментары