Вольга Няфёдава прызнала, што Купалаўскі тэатр дагэтуль не змог аднавіцца
Актрыса, якая з 2021 года спалучае ігру на сцэне з пасадай мастацкай кіраўніцы тэатра імя Янкі Купалы, расказала пра бягучыя справы культурнай установы.
Няфёдава ў інтэрв'ю «Мінск-Навінам» прызналася, што ёй няпроста і граць, і кіраваць тэатрам. Адна з прычын — дэфіцыт прафесіяналаў:
«Вядома, гэта цяжка. Прафесіяналаў не хапае, тэатр усё яшчэ аднаўляецца. Узяўшы на сябе такую вялікую адказнасць [стаць мастацкім кіраўніком тэатра — НН], ты дакладна павінна разумець, што можаш гэта зрабіць. <…> Таму ў тыя дні, калі граю, прашу ўвогуле мяне не чапаць».
Таксама Вольга Няфёдава расказала, як Купалаўскі дае рады пасля пераходу на сістэму фінансавання 50/50, якая патрабуе ад тэатру самому зарабляць на сваё жыццё.
«Вельмі складана, але такая рэальнасць. Трэба шукаць спосабы, каб рашыць пастаўленую Лукашэнкам задачу. Іншага выйсця няма. Мяне, як мастацкага кіраўніка, гэта закранула ў частцы канцэнтрацыі, выбару спектакляў — яны павінны быць наведвальныя, а значыць, акупляцца», — кажа Няфёдава.
Нагадаем, што ў жніўні 2020 года з вядучага беларускага тэатра на знак пратэсту супраць гвалту сілавікоў звольніліся амаль усе акцёры і супрацоўнікі. Пасля гэтага кіраваць Купалаўскім паставілі Вольгу Няфёдаву, а тэатр пачаў ладзіць пастаянныя кастынгі. Таксама вядома, што ў трупе нацыянальнага тэатра працуюць акцёры з Расіі.
Цяпер чытаюць
Сталініста-ябацьку з Гомеля затрымалі пасля таго, як ён запрасіў Лукашэнку на гвалтоўнае закрыццё свайго трэцяга кафэ21
Каментары