«Супраць рэжыму мусіць быць поўная блакада». Паліна Шарэнда-Панасюк выступіла з вострай прамовай у Еўрапарламенце
У французскім Страсбургу 11 сакавіка адбылася адмысловая пленарная сесія Еўрапарламенту, прысвечаная Міжнароднаму дню жанчын. Перад прыблізна 700 парламентарыямі выступілі Святлана Ціханоўская і нядаўна вызваленая былая палітзняволеная Паліна Шарэнда-Панасюк. Прамова Шарэнды-Панасюк была вельмі вострай і цвёрдай, піша «Белсат».
Паліна Шарэнда-Панасюк сказала ў сваёй прамове, што яна чатыры гады была закладніцай рэжыму Лукашэнкі і «прайшла праз пекла турмаў дыктатара, які ў нязменным выглядзе захаваў метады фізічнага і псіхічнага вынішчэння сталінскага ГУЛАГу».
«Чатыры гады поўнай ізаляцыі ад свету, ад дзяцей і родных. Чатыры гады адзіночных камераў, перасыльных вагонаў, 270 дзён ШІЗА — месцаў ізаляцыі і катаванняў. Але я вытрымала і выйшла на свабоду».
Былая палітзняволеная падкрэсліла, што цяпер на волі ў тым ліку дзякуючы прынцыповай пазіцыі дэпутатаў Еўрапарламента. Яна асобна падзякавала прэзідэнтцы Еўрапарламента Раберце Метсола за ўсе захады, зробленыя дзеля яе, Паліны, вызвалення. Метсола падчас зняволення Паліны Шарэнды-Панасюк была яе еўрапейскай «хроснай».
Паліна нагадала, што за кратамі ўсё яшчэ застаюцца тысячы іншых палітвязняў, сярод якіх — яе паплечнікі з руху «Еўрапейская Беларусь»: Яўген Афнагель, Максім Вінярскі, Андрэй Войніч, Павел Юхневіч.
«Шмат пра каго з палітвязняў няма звестак ужо больш за два гады, як пра аднаго з лідараў беларускай нацыі Міколу Статкевіча. Невядома, ці ўвогуле жывы ён. Катастрафічнае становішча ў жанчын-палітзняволеных: Вікторыі Кульшы, Алены Гнаук, Вольгі Маёравай. Я вельмі трывожуся за іхняе жыццё», — казала Паліна Шарэнда-Панасюк.
Былая палітзняволеная заклікала не верыць беларускім уладам, што палітвязні нібыта выпускаюцца праз гуманізм.
«Не. З людзей катаваннямі выбіваюць прашэнні да Лукашэнкі аб памілаванні, прымушаюць даваць «пакаянныя» інтэрв’ю і падпісваць паперы пра супрацу з КДБ. Людзей калечаць, шантажуюць, пагражаюць ціскам на сваякоў, забіраюць дзяцей і маёмасць. Сотні тысяч беларусаў пад пагрозай новых рэпрэсіяў былі вымушаныя ўцякаць з краіны», — казала жанчына.
Паліна Шарэнда-Панасюк заклікала Еўрапарламент да ўзмацнення рэальнага ціску на рэжым, не толькі праз увядзенне новых санкцыяў і дасканалага кантролю над іх ажыццяўленнем:
«Супраць рэжыму Лукашэнкі мусяць быць уведзеныя поўная блакада і гандлёвае эмбарга. Праз канцлагер пад назваю Беларусь не павінна быць аніякага транзіту тавараў, што ідуць у Еўропу з Кітаю і іншых краінаў Усходу. Рэжым павінен зрабіцца поўным ізгоем у палітычным, эканамічным і спартыўным плане».
«Без вольнай Беларусі існаванне свабоды і дэмакратыі ў Еўропе заўжды будзе пад пагрозаю, у тым ліку расійскай агрэсіі. Таксама перамога ва Украіне не будзе магчымай і поўнай без свабоднай Беларусі. […] Мы змагаемся за тыя каштоўнасці, на якіх заснаваны Еўрасаюз. У гэтай барацьбе нам патрэбная ваша дапамога», — падсумавала сказанае Шарэнда-Панасюк.
Ціханоўская выступіла ў Еўрапарламенце разам з Палінай Шарэндай-Панасюк
Алексіевіч пра вызваленне палітвязняў: Трэба размаўляць з Лукашэнкам
Андрэй Шарэнда: Пазняк або памыляецца, або хлусіць, што мае нейкае дачыненне да вызвалення Паліны
Шарэнда-Панасюк: Я разумела, што можа быць сітуацыя, калі нават дзецьмі давядзецца ахвяраваць
Шарэнда-Панасюк патлумачыла, чаму ў зняволенні адмаўлялася ад тэлефонных званкоў дадому
Шарэнда-Панасюк адказала Пазняку: Прапануйце сябе на месца палітвязняў
«Муж сышоў з Сіплым і Малым». Імаверна, пад Краматорскам украінцы адным махам убайдосілі трох беларускіх наёмнікаў18
Каментары
Туды высылаюць фрыкаў і пенсаў чыноўнікаў, непатрэбных на радзіме. Ніякіх рашэнняў там не прымаецца!
Гэта менавіта адтуль нам вешаюць лухту пра вялікую занепакоенасць, каб "незалежныя" СМІ нас супакойвалі. Справы робяцца кожнай краінай, як ім трэба.
Каб блакаваць Беларусь, дастаткова проста дамовіцца з Польшчай і Літвой - УСЁ. Але яны не пойдуць на гэта, бо грошы ня маюць паху!
[Зрэдагавана]