«Suprać režymu musić być poŭnaja błakada». Palina Šarenda-Panasiuk vystupiła z vostraj pramovaj u Jeŭraparłamiencie

Palina Šarenda-Panasiuk skazała ŭ svajoj pramovie, što jana čatyry hady była zakładnicaj režymu Łukašenki i «prajšła praź piekła turmaŭ dyktatara, jaki ŭ niaźmiennym vyhladzie zachavaŭ mietady fizičnaha i psichičnaha vyniščeńnia stalinskaha HUŁAHu».

«Čatyry hady poŭnaj izalacyi ad śvietu, ad dziaciej i rodnych. Čatyry hady adzinočnych kamieraŭ, pierasylnych vahonaŭ, 270 dzion ŠIZA — miescaŭ izalacyi i katavańniaŭ. Ale ja vytrymała i vyjšła na svabodu».

Byłaja palitźniavolenaja padkreśliła, što ciapier na voli ŭ tym liku dziakujučy pryncypovaj pazicyi deputataŭ Jeŭraparłamienta. Jana asobna padziakavała prezidentcy Jeŭraparłamienta Rabiercie Mietsoła za ŭsie zachady, zroblenyja dziela jaje, Paliny, vyzvaleńnia. Mietsoła padčas źniavoleńnia Paliny Šarendy-Panasiuk była jaje jeŭrapiejskaj «chrosnaj».

Palina nahadała, što za kratami ŭsio jašče zastajucca tysiačy inšych palitviaźniaŭ, siarod jakich — jaje paplečniki z ruchu «Jeŭrapiejskaja Biełaruś»: Jaŭhien Afnahiel, Maksim Viniarski, Andrej Vojnič, Pavieł Juchnievič.

«Šmat pra kaho z palitviaźniaŭ niama źviestak užo bolš za dva hady, jak pra adnaho ź lidaraŭ biełaruskaj nacyi Mikołu Statkieviča. Nieviadoma, ci ŭvohule žyvy jon. Katastrafičnaje stanovišča ŭ žančyn-palitźniavolenych: Viktoryi Kulšy, Aleny Hnauk, Volhi Majoravaj. Ja vielmi tryvožusia za ichniaje žyćcio», — kazała Palina Šarenda-Panasiuk.

Byłaja palitźniavolenaja zaklikała nie vieryć biełaruskim uładam, što palitviaźni nibyta vypuskajucca praz humanizm.

«Nie. Ź ludziej katavańniami vybivajuć prašeńni da Łukašenki ab pamiłavańni, prymušajuć davać «pakajannyja» intervju i padpisvać papiery pra supracu z KDB. Ludziej kalečać, šantažujuć, pahražajuć ciskam na svajakoŭ, zabirajuć dziaciej i majomaść. Sotni tysiač biełarusaŭ pad pahrozaj novych represijaŭ byli vymušanyja ŭciakać z krainy», — kazała žančyna.

Palina Šarenda-Panasiuk zaklikała Jeŭraparłamient da ŭzmacnieńnia realnaha cisku na režym, nie tolki praz uviadzieńnie novych sankcyjaŭ i daskanałaha kantrolu nad ich ažyćciaŭleńniem:

«Suprać režymu Łukašenki musiać być uviedzienyja poŭnaja błakada i handlovaje embarha. Praz kancłahier pad nazvaju Biełaruś nie pavinna być anijakaha tranzitu tavaraŭ, što iduć u Jeŭropu z Kitaju i inšych krainaŭ Uschodu. Režym pavinien zrabicca poŭnym izhojem u palityčnym, ekanamičnym i spartyŭnym płanie».

«Biez volnaj Biełarusi isnavańnie svabody i demakratyi ŭ Jeŭropie zaŭždy budzie pad pahrozaju, u tym liku rasijskaj ahresii. Taksama pieramoha va Ukrainie nie budzie mahčymaj i poŭnaj biez svabodnaj Biełarusi. […] My zmahajemsia za tyja kaštoŭnaści, na jakich zasnavany Jeŭrasajuz. U hetaj baraćbie nam patrebnaja vaša dapamoha», — padsumavała skazanaje Šarenda-Panasiuk.

• 63
• 4
• 1
• 13
• 0
• 0
• 0
• 4