Дзяржсакратар Рубіа: Спыненне вайны ва Украіне запатрабуе саступак з абодвух бакоў
У інтэрв'ю Fox News галоўны амерыканскі дыпламат падкрэсліў, што толькі прэзідэнт ЗША Дональд Трамп можа зрабіць магчымымі перамовы паміж Масквой і Кіевам.
Вайна ва Украіне павінна быць завершана, аднак спыненне баявых дзеянняў запатрабуе саступак як ад Расіі, так і ад Украіны, заявіў дзяржаўны сакратар ЗША Марка Рубіа ў размове з журналістам Шонам Хэніці, паведамляе «Голас Амерыкі».
Кіраўнік Дзярждэпартамента адзначыў, што паводле меркавання Дональда Трампа, канфлікт зайшоў у тупік, і ніхто не мае канкрэтнага плана яго завяршэння.
Рубіа ахарактарызаваў сітуацыю як проксі-вайну паміж дзвюма ядзернымі дзяржавамі — ЗША, якія падтрымліваюць Украіну, і Расіяй. «Гэта павінна скончыцца», — заявіў Рубіа.
Дзяржсакратар таксама пракаментаваў сустрэчу прэзідэнта ЗША Дональда Трампа і ўкраінскага лідара Уладзіміра Зяленскага ў Белым доме ў мінулую пятніцу.
«Мы павінны ўцягнуць абодва бакі — расіян і ўкраінцаў. І мы папрасілі ўкраінцаў не сабатаваць гэты працэс», — падкрэсліў Рубіа.
Ён адзначыў, што прычынай напружанасці стала рэакцыя Зяленскага на заяву віцэ-прэзідэнта Джэй Дзі Вэнса аб неабходнасці дыпламатычнага рашэння.
«Калі віцэ-прэзідэнт [Джэй Дзі Вэнс] падкрэсліў, што для развязання канфлікту патрэбна дыпламатыя, Зяленскі вырашыў аспрэчыць гэта, па сутнасці падрываючы план прэзідэнта», — заявіў Рубіа.
Паводле яго, менавіта гэта прывяло да спрэчкі паміж Трампам і Зяленскім. Аднак дзяржсакратар падкрэсліў, што пасля сустрэчы пазіцыя Украіны была перагледжана.
Рубіа нагадаў, што за апошнія два тыдні Вашынгтон правёў сустрэчы з Масквой, каб высветліць, ці гатова расійскае кіраўніцтва абмяркоўваць завяршэнне вайны.
«Іх адказ быў: «Мы зацікаўлены ў размове пра гэта». Цяпер нам трэба працягваць працу», — адзначыў ён.
Дзяржсакратар выказаў шкадаванне, што другі бок — Украіна — пакуль не праявіла адкрытасці да перамоў.
Журналіст Шон Хэніці запытаўся, ці будзе дамова па карысных выкапнях першым этапам урэгулявання, пасля якога адбудзецца спыненне агню.
«Ва ўкраінцаў будуць свае патрабаванні, у расіян — свае. Нам трэба зразумець, наколькі яны далёкія ад адзін аднаго. Тут і пачынаецца дыпламатыя», — адказаў Рубіа.
Ён таксама правёў паралель з сітуацыяй у Газе, дзе прагрэс у мірных перамовах паміж Ізраілем і ХАМАС быў дасягнуты дзякуючы «напружанай дыпламатычнай працы».
Каментары